|
|
Бүген кемнәр туган
|
|
Архив
|
22.02.2015 Тарих
72 елдан соң туган авылына “кайтучы” солдат22 февральдә Татарстанга 1943 елның суык кышында Бөек Ватан сугышы чорында Орлов өлкәсендә һәлак булган кызылармеец Иван Шестериковны алып кайталар. Эзтабар отрядлар сугышчының гәүдәсен узган ел тапты. Ватан өчен гомерен биргән кызылармеец 72 елдан соң туган авылының туфрагында сыену табачак... Тумышы белән Иван Шестериков Татарстанның Лаеш районы (элеккеге Столбище) Тарлаш авылыннан. 41 яшьлек кызылармеец 1943 елда Орлов өлкәсенең Болхов районы Кукуевка авылы янында барган сугышларда 22 февральдә һәлак була. Аның исеме Татарстанның Хәтер китабында да урын алган. Әмма күмелгән урыны моңа кадәр билгеле түгел иде. 2014 елда 20 июльдән 5 августка кадәр Болхов районында оештырылган чираттагы халыкара “Хәтер вахтасы”нда Россия Федераль суд приставлары хезмәте Татарстан буенча идарәсенең “Ак Барс” эзләү отряды да катнашкан иде. Бөек Ватан сугышы елларында яу кырына әверелгән бу җирдә Федераль суд приставлары хезмәте җитәкчесе Артур Парфенчиков бер сугышчының үлем медальонын тапты. Татарстанның эзтабар отрядларын берләштерүче “Отечество” берләшмәсе” яшьләр иҗтимагый оешмасы белгечләре әлеге медальонның кәгазен укырга булышты. Нәтиҗәдә, аның иясе – 356нчы укчы дивизиядән рядовой кызылармеец Иван Гаврилович Шестериков икәнлеге ачыкланды. Туганнары белән сөйләшкәннән соң, сугышчының җәсадын быел туган авылы Тарлаш зиратына аның һәлак булган көнендә – 22 февральдә җирлиячәкләр.
Татарстанда эзтабарлар отрядлары эшчәнлек алып барганга инде 50 елга якын. Аларның иң өлкәне – Казан дәүләт университетында оешкан “Карлы десант” отряды. 1993 елда аның нигезендә “Отечество” берләшмәсе” яшьләр иҗтимагый оешмасы төзелде. Бүгенге көндә ул Казан, Чаллы, Түбән Кама, Чистай, Зәй, Баулы, Бөгелмә, Менделеевск, Алабуга, Яшел Үзән, Аксубай, Алексеевск, Кукмара, Лаеш, Спас, Югары Ослан, Мамадыш, Әлки районнарыннан барлыгы 52 эзтабар отрядны һәм клубны берләштерә. Эзтабарлар Новгород, Ленинград, Волгоград, Смоленск, Псков, Ростов, Мурманск өлкәләре, Краснодар крае, Карелия Республикасы һәм Белоруссиягә экспедицияләргә йөри. 1994 елдан “Отечество” берләшмәсе инде 213 экспедициядә катнашып, Совет Армиясенең 8160тан артык сугышчысын табып җирләде, медальоннар, исемле әйберләр һәм архив документлары буенча аларның 1400нең исемнәрен ачыклады. Бөтен мәгълүматлар “Солдат медальоннарындагы исемнәр” китабында тупланып бара. 2005-2014 елларда 6 том дөнья күрде. Аларда 14280 сугышчының исеме мәңгеләштерелде. “Отечество” берләшмәсе Татарстанда Бөек Ватан сугышы елларындагы каберлекләр каталогын да төзеде. Болардан тыш, эзтабарлар сугыш вакытында Татарстан территориясендә һәлакәткә очраган хәрби очкычлар һәм аларның экипажлары турында мәгълүматлар туплау белән дә мәшгуль.
Лилия ГАДЕЛШИНА |
Иң күп укылган
|