САЗЛЫКТАН ЧЫГАРЫРГА ТЫРЫШУ

Россиянең автомобиль заводларына миллиардларча сум күләмендә ярдәм күрсә­теләчәк. Ике көн элек ил Хөкүмәте башлыгы Владимир Путинның Тольяттига баруы әнә шундый нәтиҗә бирде. Түрәләр автомобиль җитештерү сәнәгатенең коточкыч хәлдә калуын күптәннән таный инде. Белгечләр исә мәсьәләне акча белән генә хәл итеп булмаслыгын алга сөрә.

Күптән түгел Путин "Нива" машинасы сатып алуын хәбәр итте. Премьер-министрга бу машина чыннан да кирәк булганмы, әллә инде ул моны башкаларга үрнәк күрсәтү өчен генә эшләгәнме – әйтеп булмый.  Әмма АвтоВАЗга  ярдәм моның белән генә чикләнми.

Дүшәмбе көнне Хөкүмәтнең бу предприятиегә 25 миллиард сум күләмендә дәүләт гарантиясе бирәчәге билгеле булды. Шул рәвешле завод бурычларын капларга тырышачак. Башка җитештерүчеләр дә өлешсез калмады – "Соллерс" – 5 миллиард, КамАЗ – 4,6 миллиард, ГАЗ исә 4 миллиард сум күләмендә ярдәм алачак. Сүз уңаеннан, кичә Россия биржаларында иң күп үсеш күрсәткән акцияләр КамАЗ белән АвтоВАЗныкы булып чыкты.

Ил предприятиеләренә ярдәм итүнең иң беренче адымнары исә, хәтерләсәгез, Чаллыда ясалды. Путин катнашында узган киңәшмәдә Россиядә җитештерелгән автомобиль сатып алучыларга ташламалы кредит бирү хәл ителде Ниһаять, шушы көннәрдә банклар бу эшне башлап җибәрергә җыена. Кредит бирү белән Саклык банкы һәм Внешторгбанк шөгыльләнәчәк. Россия Хөкүмәте тарафыннан расланган исемлеккә исә бәясе 350 меңнән артмаган 30 модель керде. Дөрес, Chevrolet Niva һәм Focus телгә алынган суммадан кыйммәтрәк тора. Әмма түрәләр бу компанияләрнең бәяләрне бераз төшерәсенә өметләнә. Ташламалы кредит ярдәмендә машина сатып алу өчен автомобиль бәясенең 30 процентын алдан ук түләп куярга туры киләчәк. Уртача алганда, яңа ысул кредитлар буенча гына да 40 мең чамасы акчаны янга калдырырга мөмкинлек бирә. Белгечләр әйтүенчә, бу программа ярдәмендә телгә алынган модельләргә ихтыяҗ 5-7 процентка гына артса да, ВАЗ елына 30 мең чамасы машина сата алачак. Дөрес, инде бүген үк завод складларында һәм дилерлар кулында 90 мең чамасы автомобиль җыелган. Дәүләт ташламалы кредитлар программасын тормышка ашыру өчен быел 2 миллиард күләмендә акча бүлеп бирәчәк. Сәнәгать һәм сәүдә министрлыгындагылар исә мондый ысул белән елына 145-150 мең машина сатылыр дип өметләнә.

Бу программага эләккән модельләр исемлеге һәм аларның узган атнадагы уртача бәяләре "Ватаным Татарстан" сайтында.