"ТУРГАЙ" ҮРМӘСЕ

2 стакан он, 2—4 аш кашыгы шикәр комы, 2—4 аш кашыгы май (маргарин), 2—4 йомырка, 5 г чүпрә, ярты стакан су яисә сөт, чирек бал кашыгы тоз

Камырны коры чүпрәдән куябыз. 2 стакан онга 5 г чүпрә алырга кирәк. Чүпрәне он белән кушып, майдан башка барлык продуктларны да салып, камыр басабыз. Майны, куе каймак дәрәҗәсенә җиткәнче туглап, камырга иң соңыннан гына салабыз. Ә йомырка, тоз һәм шикәр комын бергә туглыйбыз да, шикәр комы эреп бетсен өчен, су (сөт) белән болгатабыз. Шушы эремәгә он һәм чүпрәне салып, 5 минут болгатабыз. Камыр катырак килеп чыкса, сыеклык өстәргә мөмкин. Камырны куна тактасында 10 мм калынлыгында итеп җәябез. Җәймәне киңлеге 6 яисә 9 см, ә озынлыгы 7 см булган тасмаларга кисәбез (озынлыгы башкача булса да ярый, тик «тургай» матур чыксын өчен, тасманы кыскарак алырга кирәк). Аннан соң һәрбер тасманы, кошның «баш» өлешен калдырып, өч кисәккә кисәбез һәм ике-өч буыннан торган толым үрәбез. «Баш»ны түгәрәклибез, «томшык» ясыйбыз, «кой-рык»ны озынайтып тартабыз, ә «баш»ның ян-ягына, кечкенә йөзем яки чикләвек төше куеп, «күзләр» ясыйбыз. Табаны азрак майлап, аңа «кошлар»ны тезәбез һәм, өстенә сөлге каплап, кабарсын өчен 40—50 минутка җылы урынга куеп торабыз. Аннан, йомырка сарысы белән майлап, 220 градус кызулыктагы мичтә 15—20 минут пешерәбез.