ТАҖДАРОВА (ӘХМӘДУЛЛИНА) НӘГЫЙМӘ ӘХМӘДУЛЛА КЫЗЫ

Г. Камал театры артистлары

Г. Камал театры артистлары: Библиографик белешмәлек. Ильтани Илалова - Казан: Татарстан китап нәшрияты, 2005.

Китапта соңгы 100 елда Г.Камал исемендәге Татар дәүләт академия театрында эшләгән һәм эшли торган артистлар белән артист-режиссерлар тормышы, иҗатына кагылышлы кыскача белешмәләр бирелә.

(1888–1947)

Хәзерге Арча районы Утар-Аты авылында туган. 1914 елда «Сәйяр» труппасында эшли башлый. Татар театрына нигез салучыларның берсе. Гражданнар сугышы елларында ул фронттагы театр бригадаларында. 1922–1926 елларда — Уфада Татар-башкорт театрында (хәзерге Башкорт академия театры). 1926 елның көзеннән Татар академия театрында.

Таҗдарова гаҗәеп итагатьле, зур талантка ия булган күренекле артистка. Ул иҗат иткән тормышчан, ышандыргыч образлар тышкы яктан кырыс тоелса да, күңел дөньясының бөтен тирәнлеге белән ачып бирелүе, психологик кичерешләренең нечкә күңелле, нәзакәтле булулары белән аерылып торалар.

Аның рольләре: Һаҗәр — «Ямьсез тормыш» (Ф.Сәйфи-Казанлы), Рокыя — «Тигезсезләр» (Ф.Әмирхан), Мария Антоновна — «Ревизор» (Н.Гоголь), Сәгыйдә — «Күмелгән кораллар» (Һ.Такташ), Татьяна — «Разлом» (Б.Лавренев), Ләйлә — «Миркәй белән Айсылу» (Н.Исәнбәт), Оксана — «Эскадра һәлакәте» (А.Корнейчук), Каринкина — «Гаепсездән гаеплеләр» (А.Островский), Айсылу — «Наемщик», Хөбәйбә — «Мактаулы заман», Гөлниса — «Ташкыннар» (Т.Гыйззәт), Саҗидә — «Шәмсекамәр» (М.Әблиев) һ.б.

ТАССРның хал. арт. — 1939 ел.
РСФСРның атказ. арт. — 1940 ел.