ТАҢЧУЛПАН

Шагыйрә һәм журналист Чулпан Шәрип кызы Әхмәтова (әдәби тәхәллүсе – Таңчулпан) 1966 елның 17 декабрендә Татарстанның Актаныш районы Бишкүмәч авылында туа. (Бу авыл инде юк, җитмешенче елларда Түбән Кама ГРЭСы төзелгәннән соң, ул су астында кала.) 1974 елда шул ук районның Тәкмәк авылы мәктәбенә укырга кереп, дүртенче-сигезенче сыйныфларны Югары Яхшый, унынчы-унберенче сыйныфларны Киров исемендәге совхоз бистәсе мәктәбендә тәмамлый. 1984–1989 елларда Казан дәүләт университетының журналистика факультетында белем ала. Студентлык чорында университетта танылган язучы Мөхәммәт Мәһдиев җитәкләгән «Әллүки» әдәби-иҗат берләшмәсенә йөри, шул елларда республика көндәлек матбугатында шигырьләре басыла башлый.

Журналистикадагы хезмәт юлын Таңчулпан 1989 елда Татарстанның Халыкка көнкүреш хезмәте күрсәтү министрлыгы каршында оештырылган «Культура быта» исемле газета редакциясендә тәрҗемә бүлеге мөдире булып эшләүдән башлый. 1992–1997 елларда «Шәһри Казан» газетасында әүвәл – хәбәрче, аннары икътисад, фән һәм мәдәният бүлекләре мөдире вазифаларын башкара. 1997 елдан ул – Татарстан Республикасы Дәүләт Советының Матбугат үзәгендә әйдәүче референт хезмәтендә.

Таңчулпан 2000 елда Татарстан китап нәшриятында басылып чыккан һәм хатын-кыз күңеленең сөю-мәхәббәттәге романтик хыял-омтылышларын, сөенеч-шатлыкларын, югалту сагышларын чагылдырган лирик-фәлсәфи яңгырашлы шигырьләре тупланган «Кыргый чәчәк» исемле китап авторы.

Таңчулпан – 2003 елдан Татарстан Язучылар берлеге әгъзасы.

ТӨП БАСМА КИТАБЫ

Кыргый чәчәк: шигырьләр. – Казан: Татар. кит. нәшр., 2000. – 111 б. – 2000 д.

ИҖАТЫ ТУРЫНДА

Әхмәдуллина Э. Гөл сагышы сарган шигырьләр // Шәһри Казан. – 2000. – 29 дек.
Шәех Л. Мавыктыргыч та, авыр да // Актаныш таңнары. – 2001. – 6 сент.
Таңчулпан. Догам – шигырь... // Заман. – 2004. – 9 гыйнв.