СПАМИНГ

Спам — интернетта таратылучы реклама ул. Гадәттә, ул электрон почта, социаль челтәрләр яки аралашу хезмәтләре аша башкарыла.

Боларны безгә белмәсәк тә ярый, диярсез. Юк шул! Моны белергә кирәк. Ник дигәндә, интернет аша аралашучы күп кеше спамнан зарлана. Әмма алар кайвакыт моңа үзләре гаепле. Электрон почта яки icq адресын теләсә кайсы сайтта язып калдырырга киңәш ителми. Юкса почтагызга килгән хатлардан үзегезгә кирәклесен аралап хәлдән таярсыз. Әрҗәгез реклама хәбәрләре белән тулган булыр.

Спам таратучылар интернетта @ билгесе кулланылган сүзләрне үзлегеннән аралап алалар. «Собачка» дип йөртелгән бу билге һәр электрон почта адресында була. Шул аралап алган адресларга спам җибәрелә дә инде. Кайбер компьютерчылар, моны белеп, үз адресларында @ билгесе урынына «собачка» дип, тулы бер сүз язып куялар. Почта хезмәтен тәэмин итүче провайдерлар һәм сайтлар (www.mail.ru, www.pocһta.ru, www.rambler.ru һ. б.) да спамга каршы көрәшә. Гадәттә, аларның үз базалары була. Һәр кеше: «Миңа теге яки бу адрестан спам тараталар»,— дип, аларга зарлана ала. Кара тамгалы адреслар исемлеге шулай тулылана да инде.

Моннан соң спам таратучы адрестан хат килсә, ул сак булырга өндәү белән киләчәк. Бу бик тә кирәк, чөнки спам арасында вируслы хатлар да еш очрый.