ШӘРӘФИЕВ РАВИЛ ШАҺАБ УЛЫ (РАВИЛ ШӘРӘФИ)

1938 елның 5 апрелендә Балык Бистәсе районы Олы Солтан авылында туа.

1961 елда Мәскәүдә Щепкин исемендәге Югары театр училищесын тәмамлап, Татар академия театрына эшкә килә. Комик пландагы зур рольләре белән танылган күренекле артист. Шул ук вакытта төрле драматик характерлар тудырырга сәләтле, киң иҗади диапазонга ия. Комедияләрдә аның образлары бик ачык сурәтләнгән көлкеле кыяфәтләре белән дә истә кала.

Аның рольләре: Яхъя — «Без аерылышмабыз» (Ш.Шаһгали), Михаил — «Гүзәлем Әсәл» (Ч.Айтматов), Искәндәр — «Американ», Рәшит — «Назлы кияү», Галәви — «Зәңгәр шәл», Хәзрәт — «Казан сөлгесе» (К.Тинчурин), Герцог — «Чамасына күрә чарасы», Петруччо — «Тискәрегә авызлык» (В.Шекспир), Низам — «Җырланмаган җыр», Адәмшаһ — «Ташлама утны, Прометей!» (М.Кәрим), Сираҗетдин — «Банкрот» (Г.Камал), Хаҗибәк — «Кол Гали» (Н.Фәттах), Әкми — «Гөлҗамал», Балтаев — «Зифа», Хуҗа — «Хуҗа Насретдин» (Н.Исәнбәт), Әҗәл — «Әлдермештән Әлмәндәр», Исмәгыйль — «Диләфрүзгә дүрт кияү», Рафис — «Дуслар җыелган җирдә», Рафис — «Хушыгыз!», Ислам — «Илгизәр + Вера» (Т.Миңнуллин), Федор — «Ябырылу» (Л.Леонов), Башкин — «Һаваларда йолдыз» (М.Горький буенча), Робинзон — «Бирнәсез кыз» (А.Островский), Хәким — «Мирас» (Г.Каюм), Мәрдәнша — «Су төбендә сөйгәнем» (З.Хәким), Гыймади — «Зөләйха» (Г.Исхакый), Теодор — «Тол ханымда тукталыш» (Э.Лабиш), Альмавива — «Фигароның өйләнүе» (П.Бомарше), Антонио — «Гаугалы гаилә», (Эд.де Филиппо), Корок — «Кара чикмән» (Г.Хугаев) һ.б.

РСФСРның хал. арт. — 1988 ел.
Татарстанның М.Җәлил исемендәге премиясе лауреаты — 1978 ел.
Татарстанның Г.Тукай исемендәге Дәүләт премиясе лауреаты — 1992 ел.