ШОКОЛАДЛЫ ТОРТ

Камыр өчен: 100 г шикәр комы, 130 г атланмай, 240 г он, 1 йомырка сарысы, 50 г какао, бер чеметем ванилин;
крем өчен: 1 стакан сөт, 4 аш кашыгы шикәр комы, 2 йо-мырка сарысы, 1 бал кашыгы он, бер чеметем ванилин, 100 г шоколад

Майны вак кисәкләргә кисәбез, шикәр комы, он, какао, ванилин, бер чеметем тоз салабыз һәм ярмаланып беткәнче яхшылап тураклыйбыз. Икенче савытта йомырка сарысын күпертәбез һәм шул массага кушабыз, тиз генә камыр басып, аны 20 минутка суыткычка куеп торабыз. Аннан соң он сибелгән кунага салып, 5—7 мм калынлыгында җәймә җәябез, квадрат кисеп алабыз. Квадратны майланган формага алып салабыз. Җәймәнең кырыйларын, пешкәндә тигез күперсен өчен, форманың кырыйларына кысабыз. Берничә урыннан камырны чәнечке белән тишкәлибез дә кызу газ мичендә 20 минут пешерәбез.

Камыр пешкән арада крем ясыйбыз. Онны табада ачык сары төскә кергәнче кыздырып алабыз, суытабыз һәм аерым савытта күпертелгән йомырка сарысын кушып болгатабыз. Кәстрүлдә шикәр комы белән сөт кайнатабыз һәм аны алдан әзерләнгән катнашмага әкрен генә болгата-болгата салабыз. Болгатуны туктатмыйча, катнашма куерганчы 5—6 минут кайнатабыз, аннан соң ванилин һәм угыч аша уылган шоколад өстибез.

Пешкән торт өстенә уртага крем салабыз, кырыйларына күпертелгән каймак (яки шикәр комы белән күпертелгән сөт өсте) салып чыгабыз.