ШӘКҮР РӘШИТ

Күпкырлы талант иясе

13.03.1937

Башкортстанның Әхмәт-Зәки Вәлиди исемендәге Милли китапханәсендә күренекле шагыйрь, публицист, галим, филология фәннәре докторы Рәшит Шәкүрнең 75 яшьлек юбилеена багышланган тантана үтте. Кичәне китапханә директоры Азат Ибраһимов котлау сүзләре белән ачып җибәрде. Соңыннан да шагыйрь адресына каләмдәшләре тарафыннан җылы теләкләр яуды.

— Әле яңарак кына Күгәрчен районында булдык, анда Рәшит Шәкүргә З. Биишева исемендәге премия тапшырылды, — диде Башкортстан Язучылары берлеге рәисе вазыйфаларын башкаручы Кадим Аралбаев. — Минемчә, ул бу якты дөньяга 1937 елда арабыздан киткән шагыйрьләр, галимнәр урынына килгән, шундый күпкырлы талантка ия булган шәхес...

Чынлап та, Р. Шәкүр күп өлкәдә үзен күрсәткән әдип — ул матур шигырьләр, фәнни китаплар авторы, журналист, Башкортстан топонимиясен, фольклорын өйрәнүче. М. Акмулланы, аның иҗатын бөтен ил күләмендә таныткан кеше. Ирек Киньябулатов әйтмешли, Акмулланы Акмулла иткән шәхес. Ул 1981 елда Акмулланың 150 еллыгын үткәрүдә зур эш алып барган, үзе исә М. Акмулла исемендәге премиянең беренче лауреаты.

Кичәдә тәбрикләү сүзләре белән Абдулхак Игебаев, Ногман Мусин, Марс Әхмәтшин, Ирек Киньябулатов, Хәсән Назар, Риф Тойгын, Гөлфия Юнысова, Тамара Искәндәрия, Мәрьям Буракаева, Фәнил Күзбәков, Марат Азнабаев һәм башкалар чыгыш ясады. Бергә укыган, эшләгән дәвердә каләмдәшләре белән булган кызыклы хатирәләр искә алынды, Рәшит Шәкүргә багышлап язылган шигырьләр укып ишеттерелде.

Рәшит Шәкүр үз китапларыннан төзелгән күргәзмә белән таныштырып, тамашачыларга яраткан шигырьләрен укыды. 23 март көнне Нефтьчеләр мәдәният сараенда шагыйрьнең юбилей кичәсе зурлап үткәреләчәк. Әдәбият кичәсенә рәхим итегез!

Гөлназ Арсланова.
"Кызыл таң"13 март.