«САПЕР» УЕНЫ

Сапер — хәрби һөнәрләрнең иң җаваплысыдыр. Компьютер уенында виртуаль сапер булу да шактый җаваплылык һәм салкын акыл таләп итә. Шулай да «Need for Speed», «Counter-Strike», «Warcraft»ка караганда, «Сапер» — гадирәк уен. «Пасьянс», «Косынка», «Солитер» кебек уеннар белән бергә ул Windows операцион системасында стандарт рәвештә урнаштырыла. Шуңа да компьютер белән эш иткән булсагыз, бу уен сезгә таныштыр.

Уенчының максаты — күп шакмаклардан торган кырда миналарны дөрес билгеләү. Әйтик, бер шакмакка басабыз. «3» саны килеп чыга. Димәк, шушы шакмак тирәсендә 3 мина бар. Кайбер очракта миналар урыны мантыйкый рәвештә табыла. Ә кайвакыт шакмакка белмичә басасың. Минага эләксәң — беттең! Уенны яңадан башла.

Миналар кырының төрлесен сайларга була. Кечкенә кырда җиңү яулавы берни түгел. Ә менә зур кырда — ай-һай! Уенның чемпионнары аерым урынга язылып бара. Беренче — өченче урыннарны миналарны мөмкин кадәр тизрәк билгеләгән уенчылар били.

Уенның сәгате бар. Озаклап уйларга вакыт юк. Әйткәнемчә, «Сапер» — гади уен. Шуңа да аны компьютерчылар ял иткән арада тиз генә уйнап алалар. Бер яктан, ул ял уены булса, икенче яктан, кешенең зиһенен үстерүче бер «тренажер».