МОСТАФИН МӨСӘГЫЙТ

(1909–1941)

Мөсәгыйт Мостафин 1909 елның 25 сентябрендә хәзерге Татарстан Республикасының Баулы районы Бәйрәкә авылында игенче гаиләсендә туа. 1927 елда Бәйрәкә җидееллык мәктәбен тәмамлап, Казанга килә һәм рабфакка укырга керә. Шушы елларда ул әдәби иҗат эше белән шөгыльләнә башлый, очерклар, хикәяләр яза һәм аларны Ютазы район газетасында бастыра. 1931 елда яшь әдипнең Казанда биш хикәясен үз эченә алган «Очрашу» исемле китабы һәм үсмер балалар өчен «Үсү» исемле озын хикәясе басылып чыга. 1932 елда аның «Тыңлыйсыңмы, кордаш?» дигән өченче китабы да дөнья күрә. Үзенең хикәяләрендә һәм нәсерләрендә яшь автор гади хезмәт кешеләренең көндәлек тормышын тасвирларга омтыла һәм җиңелчә юмор белән алардагы искелек калдыкларын тәнкыйтьли. Аның хикәяләре лирик яңгырашлы һәм тел-сурәтләү чараларының халыкчан, образлы булулары ягыннан да игътибарга лаек.

Мөсәгыйт Мостафин 1941 елның август аенда үзе теләп фронтка китә һәм шул ук елның 6 декабрендә сугыш кырында батырларча һәлак була.

ТӨП БАСМА КИТАПЛАРЫ

Очрашу: хикәяләр. – Казан: Татиздат, 1931. – 64 б. – 5000 д.
Үсү: хикәя. – Казан: Татиздат, 1931. – 36 б. – 6000 д.
Тыңлыйсыңмы, кордаш?: хикәяләр, нәсерләр. – Казан: Татиздат, 1932. – 63 б. – 5000 д.

ИҖАТЫ ТУРЫНДА

Мөсәгыйт Мостафин / төз. С.Шакир. Алар сафта. – Казан: Татар. кит. нәшр., 1961. – 141–142 б.