МӨХӘММӘТГАЛИЕВ ИЛТӨЗӘР ӘЗҺӘР УЛЫ (ИЛТӨЗӘР МӨХӘММӘТГАЛИ)

1966 елның 16 апрелендә Сарман районы Иске Минзәләбаш авылында туа.

1989 елда Казан химия-технология институтын, 1995 елда Казан сәнгать һәм культура институтын тәмамлый, Татар академия театрына кабул ителә. Шул ук вакытта үзе укыган институтта актерлык осталыгы буенча ассистент-педагог булып эшли башлый. Пьесалар тәрҗемә итә.

Студент чагында Камал театры спектакльләрендә күмәк күренешләрдә катнаша. Аның төрле характерлы шәхесләре тормышчан; аларга эчке йомшаклык, интеллигентлык хас.

Аның рольләре: Арсен — «Тол ханымда тукталыш» (Э.Лабиш), Беренче убырлы карчык — «Сукыр патша» (Н.Хикмәт), Сорин — «Акчарлак» (А.Чехов), Күрәзәче — «Җирән чичән һәм Карачәч сылу» (Н.Исәнбәт), Шүркә — «Җанкисәккәем», Әлимбәк — «Шәҗәрә», Хәзрәт — «Сөяркә» (Т.Миңнуллин), Фәндәс — «Килә ява, килә ява», «Ява карлар, ява карлар» (З.Хәким), Мартыныч — «Казан егетләре» (М.Гыйләҗев), Корок — «Кара чикмән» (Г.Хугаев) һ.б.