КЫЗДЫРЫЛГАН КАМЫРЛЫ БАЛЫК

500 г әзер балык ите, 5 аш кашыгы он, 3 аш кашыгы үсемлек мае, ярты лимон, 2 йомырка, ярты стакан кайнаган су, кыздыру өчен 100 г май

Башта камыр әзерлибез. Тирән эчле савытта онны тоз һәм үсемлек мае белән болгатабыз, ярты стакан җылы су өстибез һәм, төерләре калмасын өчен, тагын яхшылап туглыйбыз. Камырлы савытны томалап куеп торабыз. Балык итен 1 см киңлектәге һәм 5—7 см озынлыктагы кисәкләргә турыйбыз, тоз, ваклап тураган яшел үләннәр, борыч сибәбез. Балык өстенә лимон согын сыгабыз, 1 кашык үсемлек мае кушабыз һәм болгатып 15—20 минутка куеп торабыз.

Табынга куярга 10—15 минут кала, камырга күпертелгән 2 йомырка агы кушабыз. Балыкның һәр кисәген чәнечке белән алып, камырга тыгып алабыз һәм кәстрүлдәге кызган майга салабыз. Балык кисәкләре май белән каплансын өчен болгаткалып торабыз.

Табынга куяр алдыннан балык кисәкләрен җылытылган тәлинкәгә, астына кәгазь салфетка куеп, пирамида итеп тезәбез, өстенә туралган яшел үләннәр сибәбез. Аерым савытта майонез яки томат соусы куябыз. Мондый балыкны пешкән бәрәңге белән бирәбез.