КӘБИРОВ МАРАТ

Марат Рәфил улы Кәбиров 1970 елның 23 августында Башкортстанның Илеш районы Сеңрән авылында туа. Туган авылында сигезьеллык мәктәптә белем алганнан соң, Үрге Яркәйдәге һөнәрчелек училищесын тәмамлый, аннан механизатор һөнәре алып чыга.

Узган гасырның сиксәненче-туксанынчы елларында балалар матбугатында әсәрләре күренә башлый. Күренекле шагыйрь Әнгам Атнабаевның баш сүзе белән «Кызыл таң» газетасында бер шәлкем шигырьләре басыла.

1990 елда Башкорт дәүләт университетының журналистика факультетына укырга керә, әмма беренче курсны тәмамлау белән китәргә мәҗбүр була. Аннан соң «Яншишмә» дип аталган балалар газетасына эшкә урнаша. Бер ел эшләгәннән соң, 1991 елда, «Өмет» татар яшьләр газетасына эшкә күчә. «Өмет»тә биш ел эшләгәннән соң, читтән торып Башкорт дәүләт педагогия институтының татар филологиясе бүлеген тәмамлый.

М.Кәбиров 1991 елдан алып композиторлар Нәфисә һәм Ризван Хәкимовларның концерт төркемендә конферансье булып эшли. Шулай ук Айдар Галимов төркемендә, Хәния Фәрхи җитәкчелегендәге «Бәйрәм» ансамблендә концертлар алып бара. Нәтиҗәдә бик күп тамашаларга сценарийлар, көлкеле монологлар, җыр шигырьләре яза. Аларны Башкортстанның һәм Татарстанның күренекле сәнгать әһелләре башкара.

М.Кәбиров – 2008 елдан Татарстан Язучылар берлеге әгъзасы.

ТӨП БАСМА КИТАПЛАРЫ

Онытма таңнарыңны: шигырьләр. – Өфө: Китап, 1993. – 32 б. – 3000 д.
Серләшик әле бер: шигырьләр. – Өфө: «Өмет» газ. нәшр., 1994. – 112 б. – 10000 д.
Күңелле табын: шигырьләр. – Өфө: «Марат» әдәбият-сәнгать студиясе, 2000. – 96 б. – 2000 д.
Күңелле табын: шигырьләр. – 2 басма. – Өфө: «Марат» әдәбият-сәнгать студиясе, 2001. – 96 б. – 10000 д.
Өзәңгегә баскан чак: шигырьләр. – Өфө: Китап, 2002. – 96 б. – 2000 д.
Иң күңелле китап: повестьлар. – Өфө: «Марат» әдәбият-сәнгать студиясе, 2003. – 112 б. – 3000 д.
Мәхәббәт яңгыры: повестьлар. – Казан: Татар. кит. нәшр., 2006. – 431 б. – 3000 д.
Сагындым. Кайт инде...: повестьлар. – Казан: Татар. кит. нәшр., 2008. – 336 б. – 5000 д.

ИҖАТЫ ТУРЫНДА

Атнабаев Ә. Хәерле юл! // Кызыл таң (Өфө). – 1987. – № 5 (май).
Вафин М. Марат чишмәсе // Тулпар (Өфө). – 1995.
Миңнуллин Р. Өзәңгеләр өзелмәс // Р.Миңнуллин. Әсәрләр. – 7 том. – Казан: Татар. кит. нәшр., 2007. – 119–124 б.
Сафуанов С. Тере тамырларның мул шытымы // Тулпар (Өфө). – 2004. – № 4.
Заһидуллина Д. Шагыйрь прозасы // Мәйдан. – 2004. – № 1. – 96–101 б.
Сафуанов С. Нокта куя белү – зур осталык // Тулпар (Өфө). – 2008. – № 2.