ИЛЯЛОВ (ҺИЛЯЛОВ) ИСХАК ГОБӘЙДУЛЛА УЛЫ

(1899–1966)

Чиләбе губернасы Троицк шәһәрендә туа. Рус гимназиясен тәмамлый. 1919 елда Троицк татар театрында эшли башлый. 1920–1930 еллар башында — Уфа, тагын Троицк, Свердловск татар сәхнәсендә; Ташкент, Сәмәрканд үзбәк театрларында актер һәм режиссер. Урал эшче театрында (Свердловск) — художество җитәкчесе һәм директор, 1933–1934 елларда — Казан яшьләр театрында директор булып эшли. 1934–1935 елларда — Татар академия театрында. 1936 елдан — Ташкентта Хәмзә исемендәге Үзбәк академия театрында режиссер. 1948 елдан Ташкент театр институтында актер осталыгы буенча дәрес алып бара.

Аның татар театрында уйнаган рольләре: Таһир — «Таһир-Зөһрә» (Ф.Бурнаш), Шиһабетдинов — «Мятеж» (Д.Фурманов, С.Поливанов), Исмәгыйль — «Галиябану» (М.Фәйзи), Сөләйман — «Аршин мал алан» (У.Хаҗибәков) һ.б.