ICQ

Интернет аша аралашуның төрле ысуллары бар. Форум, электрон почта, чат һ.б. Әмма иң уңайлы элемтә чарасы турында әле язмадык. Сүз icq (ай-си-кью) хезмәте турында бара. Бу —махсус программа. Компьютерга урнаштыру өчен, аны www.icq.com сайтыннан алырга мөмкин. Программаның рус телендәге варианты бар, шуңа күрә ул бик уңайлы. Компьютерчылар һәрнәрсәгә үз исемнәрен тагарга яраталар, дигән идек. jcq — халык телендәге шул «аська» инде ул. Кайберәүләр татарчалатып «Асия» диләр.

«Асия» элемтәсе нидән гыйбарәт соң?

Программаның һәр кулланучысының шәхси номеры бар. Дусларыбызның телефон номерларын куен дәфтәренә язып куябыз бит — монда да шулай. Программада миңа кирәкле кешеләрнең исемлеге төзелә. Интернетка керәбез. Хәзерге вакытта интернетка тоташкан танышларым — яшел, ә тоташмаганнары кызыл чәчәк белән билгеләнгән. Кемгә телим, шуңа хәбәр язам. Интернетта булган дусларым шунда ук җавап кайтарачак, ә булмаганнары — мөмкинчелек тугач. Болай булгач, һәрбер кеше янына барып торасы юк. Менә бит алар, барысы да монда — компьютер экранында!

«Аська»да һәр кулланучы үзе турында мәгълүмат язып калдыра ала. Исемен, фамилиясен, яшәгән урынын, кушаматын, яшен һ. б. Шул рәвешле, «аська» номерын белмәгән килеш тә бу кешене җиңел генә эзләп табарга була. jcq хезмәте — теләгән кешең белән танышу өчен менә дигән урын! Кушамат дигәннән, мондагылар чат һәм форумнардагы кебек үк, никлар, ягъни яшерен исемнәр кулланалар. Менә кайберләре — Керәшен мулласы, Былтыр, Тимербикә, Клеопатра һ. б. Алар icq — аралашуны җанлырак итә. Интернет белән файдаланучылар арасында «аська» шулхәтле популяр ки, кайвакыт хәтта җитәкче-түрәләрнең визиткаларында да icq номеры язылган. Күргәнебезчә, бу хезмәт аралашу, күңел ачу, танышу өчен генә түгел, бизнеста да ул зур урын алып тора.

«Аська»ның иң өстен ягы шунда: ул вакыт һәм араны кыскарта. Әйтик, мин берьюлы Казан, Уфа, Мәскәү, Финляндия һәм Америкадагы танышларым белән реаль вакытта, компьютерча итеп әйтсәк, oнлайн режимында аралашам. Моны телефон аша эшләсәм, күпкә мәшәкатьлерәк һәм чыгымлырак булыр иде. Шуңа күрә бу элемтә миңа бик тә ярдәм итә. Яшәсен «Асия» элемтәсе!