«ФОРСАЖ»

Бу киноны караганыгыз бардыр. Төнге шәһәр. Урамда төрле төстәге утлар уйный. Урам буйлап зур тизлектә машиналар чаба. Бу фильм заманында дрэг-рейсинг дигән спорт төренә нигез салган иде. Мондый автоузышлар әле дә бөтен дөньяда үткәрелә. Кайдадыр алар рәсмиләштерелгән ярыш буларак оештырыла, ә кайдадыр хокук саклау органнары мондый уеннарны ошатып бетермиләр. Зур тизлек яратучыларга иң яхшысы — компьютер уенында үзеңне сынап карау.

Геймерлар арасында «Форсаж-2» уены бик популяр. Аны «NFS», «GTA» автоузышлары белән бер рәткә куеп була. Уенчы үзенә теләсә нинди машина сайлый ала. Телисең икән, «BMW», «Mercedes», «Audi» руле артына утыр. Экстрим яратсаң, «Porsche», «Lamborghini», «Jaguar»ны сайла. Компьютерда бөтен машина да бертөрле йөри дип уйлаучылар ялгыша. Һәр автомобиль үзенчәлекле. Тимер атны дөрес итеп сайлауга карап, ярышның нәтиҗәләре дә үзгә булырга мөмкин. «Форсаж»да 27 автомобиль тәкъдим ителә.

Икенче этап — трассаны сайлау. Уенда 10 төрле трасса бар. Шуларның һәркайсы, авырлыгына карап, тагын берничәгә бүленә. Юлларның, урамнарның матурлыгын тасвирлап тору кирәк түгелдер. «Форсаж» киносын исегезгә төшерегез. Монда да нәкъ шулай. Сезнең җиңүгә меңләгән кеше шаһит булыр. Компьютер уенында алар халык көтүе түгел, ә графика ярдәмендә җентекләп эшләнгән аерым-аерым кешеләр. Алар сызгыра, кул чаба, сезгә шулай итеп дәрт өсти. Ә двигатель үкерүен, тәгәрмәчләр сызгыруын ишетсәгез, бу уен сезне үзеннән-үзе виртуаль экстрим дөньясына алып кереп китәр.