ФЛЭШМОБ

Яшь кешеләр яраткан шөгыле буенча үзенең ишләрен табалар һәм төркем булып оешалар. Аннары бу төркем вәкилләренә сәер яңгырашлы атама тагыла. Бу бигрәк тә шәһәр яшьләренә хас. Моңарчы ишетелгән рокерлар, скинхедлар, райдерлар, клабберлар рәтенә инде флэшмоберлар өстәлде.

Флэшмоб, башка агымнар кебек үк, чит илдән — Мәскәүгә, Мәскәүдән безгә килгән. Берәүләр кара халыкка каршы чыгып, икенчеләр дискотекаларда биеп яки мотоциклларда җилдереп көн үткәрсә, флэшмоберларның шөгыльләре болар арасында бөтенләй мәгънәсез күренә. 

Флэшмоб тарафдарларының максаты — шәһәрнең берәр урынында көтмәгәндә җыелып, берәр мәгънәсезлек эшләү. Күз алдыгызга китерегез, урам буйлап барасыз, ә юл уртасында егермеләп кеше, җиргә утырып, бәрәңге әрчи. Яки барысы бергә артыгыздан ияреп китәләр һәм барысы да сезгә карый. Яки мондый очрак: музыкаль киоскта берәр җырны яңгыратырга сорыйсыз. Шунда бер төркем яшьләр йөгереп килә һәм бергә бии башлыйлар. Бу флэшмоберлар үткәргән акцияләрнең берничөсе генә. Аларда мәгънә эзләргә ашыкмагыз, чөнки ул юк! Шуңа күрә флэшмоберларны юләрләр йортыннан качкан кешеләр дип уйлаучылар да бар.

Кайбер акцияләр махсус бәйрәм уңаеннан эшләнә. Тукай мәйданында бер төркем яшьләрнең үбешеп торганын күргән булсагыз, белегез, бу флэшмоберларның гашыйклар көнен бәйрәм итүләре. Хәзер трамвай-троллейбусларда «куяннар» бик күп. Әмма кондуктор һәм пассажирларның шул тамаша күп колаклы куяннарны күргәннәре булмагандыр әле. Бу да алар эше. Бауман урамында аркылыга бау сузып кер киптерүчеләр дә шулар.

Акцияләре барып чыкмаган чаклары да бар икән. Бервакыт «Балалар дөньясы» кибетендә җыелып, курткаларын кире якка әйләндереп кияргә сөйләшкәннәр. Үч иткәндәй, ике яклы куртка киеп килүчеләр күп булган.

Флэшмоберларның үз кагыйдәләре дә бар. Акция вакытында көләргә, сөйләшергә, кешеләр белән конфликтка керергә ярамый. Әгәр дә акциягә журналистларның күзе төшсә, ул — уңышсыз үтте дигән сүз. Шулай да бер дә конфликтсыз булмый икән. Бервакыт кафе хезмәткәре яшьләрне куып җибәргән. Бер караганда, шөгыльләре дә ачулы түгел кебек. Әмма уйлап карагыз, сез кафеда утырасыз, ди, ә тәрәзәдән сезнең чәй эчкәнне утызлап кеше күзәтә. Кемгә ошар бу?

Иң беренче флэшмоб әле узган ел гына Нью-Йоркта үткән. Анда 150 кеше, җыелып, кибеткә кергәннәр. Барысы да сатучыдан палас сорый, ди! Хәзер бу шөгыль белән мавыгучылар Яр Чаллы, Әлмәт, башка шәһәрләрдә дә бар. Башкарасы эшләренә алар интернет аша элемтәгә кереп әзерләнәләр.