ДИСКЛАР ҺӘМ ФОРМАТЛАР

Бер танышыма компакт-диск бүләк иткәннәр. Магнитофонына өсте белән дә, асты белән дә куеп карый бу моны — тавышы юк. Баксаң, бу MP3 форматында язылган диск икән. Бик үпкәләде танышым. Үзе кемне гаепләргә дә белми: әллә магнитофонны, әллә дискны, әллә инде аны бүләк итүчене. Профессиональ аппаратура аның белән эш итә белмәгән кеше кулында гади тимергә әйләнә, диләр. Чыннан да шулай.

Югары технологияләр заманында яшибез бит. Дисклар соңгы вакытта шул хәтле катлауланды ки, аларның төрләрен аңлатып, сатучының җаны чыга. Элек рәхәт иде: аудиотасма да, видеотасма (граммофон пластинкалары заманына кагылмыйм). Хәзерге кибет киштәләрендә ни генә юк: CD, DVD, MP З, MPEG! Бу әле киң катлам кулланучылар өчен. Моннан тыш, профессионаллар өчен Betecam, DVD, SVHS, Datt, MD һәм башка мәгълүмат саклау җиһазлары бар. Өйдәге аппаратурада, компьютерда уйнатырлык форматлар турында белергә вакыт, минемчә. Югыйсә кулыгыздагы техниканың тимер кисәгенә әйләнеп калуы бар.