ШӘКЕРТНЕҢ “КЫЗГАН ТАБА”СЫ ЯҢАДАН КЫЗА

24 мартта «Казан» милли-мәдәни үзәгендә “Кызган таба” татар дискәтүге башланып китә. Ул атна саен булыр дип көтелә. Ачылыш көнне махсус кунаклар да киләчәк: “Зөләйлә”, Вил Усманов һәм “Казан” бию ансамбле. Шулай ук яшь, танылып килүче башкаручылар да булачак. Оештыручы һәм алып баручы – ди-джей Шәкерт үзе.

“Кызган таба” – яшьләр арасында билгеле исем. Ул татар-төрек дискәтүге дә булды, шул ук исемдә бәйсез татар клуб музыкасы фестивале үтте. Быелның башыннан “таба” радиопроек буларак танылу алды. Атна саен “Яңа гасыр” радиосында һәр пәнҗешәмбе «Кызган таба» татар клуб музыкасы хәрәкәтендәге яңалыкларны сөйли, татар ди-джейлары белән таныштыра, кыздыргыч, яңа татар ремиксларын, миксларын әйләндерә. Хәзер инде ул радиопроект кына булып калмый, атналык дискәтүк булырга тора. Ди-джей Шәкерткә “Казан” милли-мәдәни үзәге татар дискәтүге үткәрик әле, элегрәк бездә ул бик популяр иде, дигән тәкъдим белән чыга. Шәкерт инде (чын исеме – Рөстәм Исхаков) бу өлкәдә күпмедер тәҗрибәсе, үзендә бик күп татар бию көйләре, ремикслары тупланмасы була торып каршы килми.

“Кызган таба” заманча һәм ретро татар дискәтүге булыр дип көтелә. Анда өлкән һәм яшь буын җырчылары, артистлары чыгыш ясаячак. Милли, заманча биюләр дә каралган, аларны танылган “Казан” бию ансамбле башкара. 24 мартта кичке 9дан төнге 1гә кадәр “Кызган таба” егет-кызларны, абзый-апаларны “таба”да җырлап-биеп күңел ачырга чакыра.