Татарстанда эш хакы ничек үзгәргән?

Татарстан халкының чи­ре­генең хезмәт хакы минималь кулланучы бюджетыннан, ягъни 10 мең 987 сумнан түбән. Узган ел республикада чынбарлыктагы эш хакының үсеш темпы – 2 тапкырга, ә акча кереме күләме 6 тапкырга кимегән.

Бу хакта кичә Профсоюзлар федерациясе советы утырышында федерация рәисе Татьяна Водопьянова белдерде. Әлегә Татарстан Россия төбәкләре арасында эш хакы күләме буенча – 29, ә Идел буе федераль округында 1 нче урында тора. Икъ­тисадның үсеш темплары акрынайса да, республика халкының кәгазьдә күр­сәте­лә торган акча кереме 8,7 процентка арткан. Бу күрсәт­кеч 26,1 мең сумга тигез. Ә уртача хезмәт хакы узган елда 12,9 процентка күбәйгән һәм 26 мең сумга җиткән.

Шул ук вакытта Татарстанда уртача хезмәт хакы кулланучының минималь бюджетыннан кимрәк булган оешмалар саны да ки­мегән. Ә минималь кулланучы бюджетыннан тү­бән хез­мәт хакы алучылар саны былтыр 9 процентка азайган. 2013 елның ахыргы чи­ре­гендә республикада минималь кулланучы бюджеты күләме 10 мең 987 сум дип билгеләнгән иде. Бүген Татарстанда 250 мең кеше шушы күрсәткечтән кимрәк акча алып эшли. Татарстанда хезмәт хакы бурычы һаман югары булып кала бирә. 1 мартка алынган мәгъ­лүмат буенча, бурыч 175 млн сумга җиткән. Әлеге күрсәт­кеч буенча Татарстан – Рос­сиядә беренче урында. Икенче урында – Мурманск өл­кәсе (172 млн сум), өчен­чедә – Камчатка крае (133 млн сум). Россиядә тоткарланган хез­мәт хакы күләме 1 мартка 2,665 млрд сумга тигез.