Сез медицина оешмалары эшчәнлегеннән канәгатьме? (Сораштыру)

Халыкның медицина оешмалары эшчәнлегенә карата канәгатьсезлек белдерү очраклары саны буенча Татарстан – Россия төбәкләре арасында бишенче урында. Республикада 1 миллион пациентка 1097 зарлану очрагы туры килә. Мәҗбүри иминиятләштерү территориаль фонды тарафыннан төзелгән “кара исем­лек”кә республиканың 11 хастаханә һәм дәваханәсе кертелгән.

Антирейтингның беренче дүртлегендә Новгород өлкәсе (1097 зарлану очрагы), Санкт-Петербург шәһәре (1020), Томск өлкәсе (678) һәм Камчатка крае (622) урнашкан. Ничек уйлыйсыз, медицина тармагы алга киткән хәзерге заманда халык нигә һаман медицина оешмалары эшчәнлегеннән зарлана? Сез аннан канәгатьме?

Азат Гыйльманов, Пит­рәч районы Шәле табиблык амбула­тория­се­нең баш табибы:

– Авылдан киткән саен, пациент белән табиб арасы ерагая бит ул. Хәзер яшь­ләргә тизлек кирәк. Бәлки, шул да йогынты ясыйдыр. “Башка илләрдә әнә шулай эшлиләр”, – дип, чит ил үрнәген алга сө­рүчеләр дә бардыр. Анысын төгәл генә әйтеп булмый. Әмма бездә алай зарланучылар юк. Дарулар мәсьәләсендә генә аң­ла­шылмаучанлыклар килеп чыгарга мөмкин. Табиб бит ул, нинди даруны файдалы дип санаса, шуны язарга, ә даруханә ул язган даруны берничә көн эчендә табып бирергә тиеш. Ә бездә ул киресенчә килеп чыга. Безгә атна саен исемлек бирәләр һәм табиб шул булган даруларны гына язарга мәҗбүр. Шәһәр җирендә укол кадаган, “перевязка” ясаган өчен дә акча сорыйлар дигән сүз­ләрне ишетергә туры килә. Авыл җирендә мондый хәлнең булганы юк.

Фәрид Мифтахов, Татарстан Дәүләт Советы депутаты:

– Табиблар, укытучылар, аз хезмәт хакы алып эшләсәләр дә, үз хезмәтен намус белән башкарырга тиеш. Ләкин хәзерге вакытта вәзгыять башкача. Әй­тик, бүген укытучы эшен җиренә җиткереп эшли алмый. Балаларга өстәмә белем алу өчен репетиторлар кирәк. Шул ук укытучы эштән соң репетиторлык белән шө­гыльләнә. Мөгал­лимнәр кебек үк табиблар да үз эшен тиешле дәрә­җәдә башкармый. Яхшы хезмәт күрсәт­сеннәр өчен, аларга күп очракта таныш-белешләр аша чыгарга, яки яхшы гына “бүләк” ките­рергә кирәк. Болар барысы да халыкта канә­гатьсезлек уята, билгеле. Пациентларны дәрәҗә­се­нә карап яисә башка сәбәпләр нигезендә “аеру” да ризасызлык тудыра. Шу­ңа күрә табиблар өчен намус һәм гаделлек төшен­чәләре һәрчак беренче урында торсын иде.

Зиннур Тимергалиев, шагыйрь (Арча):

– Шәхсән мин медицина оешмалары эшеннән бик канәгать. Ә халыкның зарлануы табибларның саны җитмәү белән аңлатыла, минемчә. Алар халыкны кабул итеп өлгермиләр. Шул гына. Табиблар көн буе кабинеттан чыкмый утырса да, чират кимеми. Мин – икенче группа инвалид. Арчаның район хаста­ха­нәсендә еш дәваланырга туры килә. Анда стационар табиблары иртәнге сигезенче яртыдан төнге унга кадәр хезмәт куя. Сәгать биштә: “Эш вакыты бетте”, – дип кайтып кит­миләр. Авыр хәлдәге ке­шеләрне төн буе саклап чыккан чаклары да була.

Илназ Гарипов, җыр­чы:

– Бу жәйдә әниемнең йөрәгенә операция ясадылар. Ул бүген үзен бик әйбәт хис итә. Аллага шөкер. Шуңа да ниндидер тискәре сүзләр әйтәсем килми. Татарстан­ның антирейтингта бишенче урынга чыгуына кил­гәндә, халыкның ризасызлык белдерүе бер медицинада гына күзәтелми. Бөтен өлкәдә шул хәл.

Ләйсән Сафина "Идел" яшьләр үзәге җи­тәкчесе:

– Мин медицина хез­мәт­кәрләренә сирәк мө­рәҗә­гать итәм. Ләкин туган­на­рым, дусларым, та­ныш-бе­лешләрем сөйлә­гәнчә, ул өлкәдә профессионаллар, бел­гечләр бик аз. Халыкка түләүсез рәвештә ярдәм алу юк дәрәҗәсендә бит. Ә хас­таханәгә керсәң, кеше төсле караучылар бик аз. Халык зарланмый булдыра алмый. Хастаханәгә үз даруың бе­лән бар инде! Даруханәгә керер­гә дә куркыныч. Дөнья хәтле акча калдырып чы­гасың. Үзебез­дә чыккан арзан дару юк дип, читтән кайт­кан кыйм­мәтлене саталар. Анысына үзем һәрвакыт шаккатам. Хәзер күпчелек кеше түләүле клиникаларга мөрә­җәгать итә. Дәвалавы шулай ук булса да, анда сиңа кеше итеп карыйлар. Медицина алга китә дә бит, лә­кин заманча җиһаз һәм давалану өчен күп акча түгәргә кирәк.