“Мәгариф” журналына – 100 ел

Республикабыздагы иң өлкән басмаларның берсе булган “Мәгариф” журналына 100 яшь тулды. Шул уңайдан Казан (Идел буе) федераль университетының гаммәви коммуникация һәм социаль фәннәр институты, “Мәгариф” журналы редакциясе, “Татмедиа” ААҖ, Татарстан журналистлар берлеге «Белем һәм тәрбия чарасы буларак татар журналистикасы” дигән темага фәнни-гамәли конференция уздырырга җыена.

Конференция 2014 елның 26-27 февралендә “Татмедиа”, Татарстан журналистлар берлеге һәм КФУ биналарында узачак.

Фәнни-гамәли конференция кысаларында түбәндәге секцияләр эше планлаштырыла: “Белем һәм тәрбия бирүдә гаммәви коммуникация чаралары һәм яңа технологияләрнең роле”, “Татар журналистикасында мәгариф басмаларының үсеше”, “Мәгърифәтче журналистлар мирасы”, “Басма һәм электрон мәгълүмат чараларында сөйләм культурасы проблемалары”.

Конференция йомгаклары буенча фәнни җыентык бастырып чыгару күздә тотыла.

Конференциядә катнашырга теләүчеләр 18 февральдән дә соңармыйча tat.konf-2014@mail.ru электрон адресына заявкалар җибәрергә тиеш. Конференция материаллары (10 биттән дә артмаган күләмдә мәкаләләр, тезислар, чыгышлар 14 кегль, берле интервал, Times New Roman шрифт белән) шул ук электрон адрес буенча 2014 елның 25 февраленә кадәр кабул ителә.

Конференция программасының проекты КФУның гаммәви коммуникация һәм социаль фәннәр институты һәм “Татмедиа” ААҖ сайтларында игълан ителәчәк.