Минутларны ник саныйсың яки «Матбугат.ру» җиңүчесе билгеле!

Ул Яңа ел дигән ник астында язучыбыз. 2014 елның иң беренче секундларында сайтыбызда комментарий язган ул. Исем-фамилиясен әйтмәскә кушты, әмма аның турында бераз мәгълүмат бар.

2013 елның соңгы көннәрендә «Матбугат.ру»да кызыклы бәйге игълан иткән идек. Иң беренче комментлар (00:00:01 һәм 00:00:02) Татар дигән ник белән язылган, әмма алар бәйгедән төшеп калды, чөнки уенның шарты үтәлмәгән – e-mail адрес күрсәтелмәгән.

00:00:06 вакыты белән теркәлгән Яңа ел нигы астында язылган комментта исә бар шартлар да үтәлгән. Ул Әлмәндәр, Нурфия, Илнур, Гөлшат, Ләлә, Сөмбеләләрне узып киткән. Маладис.

Вәгъдә иткәнчә, җиңүчебез белән элемтәгә кереп, аның телефон номерына 300 сум күчтәнәч җибәрдек. Ул Казан артында яшәп ята икән. “Яңа ел – гаилә бәйрәме. Ә мин ялгыз кеше. Шуңа да аны берүзем, юк ла, “Матбугат ру”, “В контакте” сайтлары белән каршы алдым, - ди ул,- Электрон почтамны, комментарийны алдан әзерләп куйдым, узган ел почтаны язарга оныткан идем.Эшем компьютер белән бәйле булгач, “Матбугат.ру”га көнгә әллә ничә мәртәбә керәм. Комментарийларны сирәк калдырам. Махсус тәхәллүсем дә юк. Әлеге сайт турында “ТЯ”дан укып белдем. Сайт ошый. Барлык язмаларны һәм комментарийларны укып барам дип әйтә алмыйм. Сайлап кына укыйм. Рәхмәт сезгә! Үземне “невезучий” дип йөри идем. Ике ай элек икенче бер сайт уздырган лотереяда җиңгән идем инде. Монысы – икенче тапкыр! Барлык матбугатручыларны Яңа ел белән котлыйм! Исәнлек-саулык телим. Барлык хыялларыгыз чынга ашсын! Якыннарыгызның кадерен белегез”.

Рәхмәт белән бергә җиңүчебез үз дәгъвасын да белдерде: “Сәгатегезнең дөреслеген гел тикшереп тордым. Ә ул  һаман үзгәреп торды. Панельдәге сәгатьтән 13 секундка алдан җибәргән идем, 00.00.06 ны күрсәтте”.

Менә шулай. Алдан әзерләнү, сәгатьне алдан тикшереп карау җиңү алып килгән. Котлыйбыз!)