Ярдәмгә иганәчеләр советы килә

14 декабрьдә Түбән Новгород өлкәсе Уразавыл мәдәният йортында өлкә имамнарының киңәйтелгән пленумы узды. Аның эшендә кайбер авыл башлыклары да, район җитәкчеләре дә, күренекле эшмәкәрләр һәм дә Россиянең Европа өлеше мөселманнары Диния нәзарәте вәкилләре, Америка татар җәмгыяте рәисенең урынбасары катнаштылар.

Өлкәнең эчке эшләр министрлыгы вәкиле А.В. Разгуляев татар җәмәгатьчелеге активын һәм рухи лидерларыбызны сәламләп, күп милләтле төбәгебездә татарларның рухи, иҗтимагый һәм милли-мәдәни оешмаларының динара мөнәсәбәтләрне ныгытуга керткән өлешләрен билгеләп үтте.

- Ышанам, бүгенге чарада катнашучылар да конструктив рәвештә эшләп, көн үзәгендә торган мәсьәләләрне киңәшләшеп уңай хәл итәрләр һәм өлкәдә милләтара дуслыкны сакларга тагын бер мөһим адым ясарлар дип беләм, - диде Алексей Владимирович.

Залда утыручыларга ислам сәламнәре юллап, көн тәртибендә булган беренче сорау буенча сүзне өлкә Диния нәзарәте (ӨДН) рәисе Гаяз хәзрәт Закиров тотты. Ул кыскача гына ӨДНнең приоритетлы юнәлешләре турында сөйләде. Шулар арасында авылларда имамлык итәргә теләк белдергән яшь һәм укымыш муллаларга торак белән ярдәм итүне, аларга хезмәт хакы билгеләүне дә әйтеп узды. Һәрхәлдә, Гаяз хәзрәт шул хакта өлкә губернаторы Валерий Шанцев белән очрашып сөйләшкән. ӨДНнең эшчәнлеген җәелдерү максаты белән ул яңа сайланганнан соң өч тапкыр Мәскәүдә һәм ике мәртәбә Казанда булган. Дзержинскта яңа төзелеп килгән мәчетнең гөмбәзен куйганнар. Аңа газ кертү проекты да эшләнгән. Тиздән алтынга манып алынган ярым айларын да күккә чөяр. Бу ярдәмне Дзержинск мөселманнарына Нижгар һәм Арзамас митрополиты Георгий күрсәтергә булган.

- Т.Новгородта Ярминкә мәчетенең төзелеш эшләрен башлар өчен кирәкле кәгазьләрне кирәкле инстанцияләр буйлап йөртәбез. Өлкә хөкүмәте, Т.Новгород һәм Дзержинск шәһәрләре хакимияте органнары белән эшлекле сөйләшүләр алып барабыз. 2015 елда Т.Новгород Җәмигъ мәчетенең гасырлык юбилеен билгеләп үтәчәкбез. Ә шушы бәйрәмгә әлеге тарихи бинаны күркәм сыйфатка китерер өчен, аңа реставрация эшләргә кирәк. Бу өлкәдә Валерий Шанцев безгә ярдәм итәргә ышандырды.

20 еллык эшләү дәверендә ӨДНнең хаталары да, кимчелекләре дә булгандыр. Белгәнегезчә, эшләмәгәннәрдә генә хата юк.

Бүген өлкәбездә 62 мәчет бар. Тик берсе кызганыч, хөрмәтле имамнарыбыз картая бара, ә аларга лаеклы алмаш юк, аеруча авыл җирендә. Диния нәзарәтенең планнары зур, алда торган мәсьәләләре дә шактый. Шуңа күрә без ӨДН каршында Иганәчеләр (попечительский) советы оештырырга кирәк, дигән карарга килдек, - дип сөйләде Гаяз хәзрәт.

Дин юнәлешендә уку-укытуны үстерү турында ӨДН рәисенең беренче урынбасары, “Маһинур” мәдрәсәсе директоры, әлеге пленумда алемнар Советы рәисе итеп тә сайланган Абдулбари хәзрәт Мөслимов сөйләде. Аның сүзләреннән аңлаганыбызча, бүген Т.Новгород мәдрәсәсендә 29 студент кичке төштә дини белем ала. Дин сабакларын үзләштерергә теләүчеләр өчен Кызьмавылда шартлар тудырганы өчен К.Октябрь районы башлыгы Халит Мөхәммәт улы Сөләймановка рәхмәтләрен белдерде Абдулбари хәзрәт. Шулай итеп, югары белемле дин белгечләре әзерләүдә якын киләчәктә ӨДН өч баскычлы уку-укыту процессына ирешәчәк: якшәмбе мәктәбе – мәдрәсә – институт.

Надир Мансур улы Хафизов Иганәчеләр советы барлыкка килүне хуплады. “Без бу турыда әле 20 ел моннан элек сөйләшкән идек, әмма ул чакта безнең фикерләр яклау тапмады”, - диде күренекле якташыбыз һәм барысын да киләчәк Яңа ел белән тәбрикләде, исәнлек-саулык теләде.

Иганәчеләр советының положениесе, аның төп мәсьәләләре белән Рамил Әхмәт улы Салихҗанов таныштырды.

Аксакаллар Советы әгъзаларын, рәисен сайлауны пленум киләсе утырышка калдырды. Бүгенгә кадәр өлкәбезнең көньяк-көнчыгыш районнары имамнарына бер мөхтәсиб иде. Хәзер К.Октябрь районының үз мөхтәсибе булыр, Пильна районы белән Красный Остров имамнары үз араларыннан мөхтәсиб сайлар, ә Сергач, Спас һәм Ыргу имамнары үз мөхтәсибләрен билгеләрләр.

Пленум барышында үзәк ревизион комиссия дә сайланды, ӨДНнең тагын ике рәисе билгеле булды: Россия мөфтияте вәкиле Җәфәр хаҗи Фәйзрахманов һәм ЭкоГрадның директорлар советы рәисе Шамил Нариман улы Мансуров.

Әйткәнемчә, пленумда хөрмәтле кунак буларак Америкадагы татар җәмгыяте рәисенең урынбасары Илдар Агиш та катнашты. Ул иң баштан андагы татар оешмасын үзе җитәкләгән, олыгая төшкәч, яшьрәк милләттәшебезгә рульне тапшырган. Аның әти-әниләре моннан күп еллар элек Пенза ягыннан Кытайга барып урнашкан. Илдар әфәнде үзе дә Кытайда туган, әмма тормышын Америка белән бәйләгән.

Анда үз бизнесын бүгенгәчә алып бара. Милли тормышка килгәндә, американлы татарлар зурлап мәҗлесләр оештыралар икән, Сабантуйлары да була. Бөтендөнья татар конгрессы белән тыгыз хезмәттәшлектә торалар. Татарстан артистлары да гастрольләр белән килгәли икән. Зурлап Америка татарлары Тукай кичәсен, Әтиләр һәм Әниләр көннәрен билгеләп үтәләр, дини бәйрәмнәрне дә зурлыйлар.

Илдар әфәнде “Туган як” газетасы аша барча нижгарлы татарларны үз исеменнән киләсе Яңа ел белән тәбрик итүебезне үтенде һәм милли хәрәкәттә, шәхси тормышыбызда хәерле эшләргә генә тап булуыбызны теләде. 

1

Илдар Агиш