“КРУТОЙСКИЙ ДИ-ДЖЕЙЛАР”

Яхшы гадәттерме, начармы – анысын белмим, мин йокыдан уянып, күзләремне ачуга, радионы кабызам. Ул шулай көне буе сөйли, җырлый. Аңа кушылып үзем дә моңланам. Еш кына радио тавышына йоклап та китәм. Университетта укып, телебезнең нечкәлекләренә төшенә барган саен, һәр кешенең сөйләменнән гаеп таба башладым. Радио ди-джейларының бәхете: алар мине ишетми. Кызганыч...

Шулай бер көнне дәресләремне карап утырам. Өстәлнең теге башында "сөйләнеп" торучы радио бөтен фикерләремне чуалтты. Белмим, нинди ешлыктагы радио булгандыр. Хәер, татар радиолары исәпсез-хисапсыз түгел инде. Чираттагы мәгънәсез уеннарын уйнаталар. СМС җибәреп катнашырга мөмкин. "Ответыгыз ошады. Күңелле звоноклар белән дә шалтыратыгыз. Менә, мәсәлән, минемчә, син ничек дип күзаллавыңны уртаклаша аласың. Эмоцияләрем бик свежий. Бөтен правилаларны соблюдать итәбез", – дип аңлаешсыз, ни русча түгел, ни татарча булмаган сүзләр тезеп китте "яраткан" ди-джеебыз. Ярар, мин әйтәм, ияләшеп китә алмыйдыр. Бераз тыңлап карыйм да, туры эфирга чыгып: "Татар яшьләре ничек текә ял итә икән?" – дип куелган соравына алардан да текәрәк итеп сөйләп бирәм.

Рус эстрадасы җырларының сүз­ләрен "бик тәмләп" тәрҗемә кылганнар да, көнгә шуны ун-унбиш тапкыр әйләндерәләр. ­ Ә мин көтәм, һаман шалтыратулар кабул итмиләр. Бер маңкорт икегә әй­ләнде. Ди-джей янына тагын берәү килеп кушылды. "Может булыр, может не сможем да бит. Вот... Санагыбыз техник сәбәпләр аркасында ял итә, интернет-юлламалар кабул итмибез. Вот... Ә сез, хөрмәтле дуслар, ике заяцның койрыгын берьюлы тота аласыз, урыс әйтмешли. Вот..." Их, мәгънәсезләр, урыс ике телне ботка урынына болгатмый шул! Компьютерның татарча "санак" икәнен белү дә, сез – мескеннәргә берни дә бирми. Ачуым чыкканын сизми дә калдым. Бөтен дәресләремне ташлап, игътибарны радиога юнәлттем. Ул сөйләгәнне тыңлап, язып, төзәтеп утырам. Тегеләрнең җанлы әңгәмәләренә мин дә кушылдым. Алар гына ишетми...

"Төрле городлардан килгән крутойский яшьләр. Үземнең пассажирларымның безопасностьлары өчен отвечать итәм. Нелегальный гонкалар..." Аңлавымча, бу сөйләшү машина йөртү, узышлар белән бәйле булып чыкты. Сүзләрен аңларга тырышып, мәгънәгә төшенә алмыйча калам. Ә алар һаман шалтыратулар кабул итми.

Чиратта ниндидер инглиз җыры. Ди-джей җырның исемен телен сындыра-сындыра булса да әйтеп чыкты. Мин язып җитешә алмадым...

Үзара нәрсәдер сөйләшәләр. Әйтерсең, алар туры эфирда түгел. Ниндидер дәртле музыка куйдылар. "Тамашачылар, безгә кушылып сез дә бии аласыз. Әнә карагыз әле, фәлән нинди матур номерлар ясый. Хоо... без биибез!" Биеми ни... Бар микән сатуда ди-джейларның студиядә маймылланып утыруларын күрсәтә торган радио? Алыр идем...

Мин дә СМС җибәрдем. Бәясен куя белгәннәр әле! Шуңа күрә кыса-кыса яздым. Бөтенесенең: "Сез – иң шәп радио! Сез – супер ди-джейлар!" ише хә­бәрләр юллавына тәмам ияләшеп беткәннәр. Минем бер-ике тәнкыйть сүзе язып җибәргән СМСымны яңгыратмадылар. Гәрчә шул минутында хәбәремнең барып ирешүе турында җавап килсә дә.

Их, кая бара бу замана? Җәмгыять белән тыгыз элемтәдә торган мәгълүмат чараларын да тәртипкә китерә алмагач, калганына шаккатасы түгел. Радиода эшләгән кеше бераз тәнкыйтьне дә кабул итә белергә, тамашачы белән тыңлаучыны, карау белән тыңлауны, урыс белән татарны аерырга, инде һич югы матур итеп исәнләшергә тиештер бит?! Ярты сәгатьлек тапшыруны кеше төсле итеп алып бара алмагач...

"В принципе и так можно; и не говори, понедельниктан четвергка кадәр; определенный вакыт", – дип юк-бар сөйләп утырып кына югары үрләр яуланамы соң? Болай булса, тыңлаучылар, сизмәстән, башка ешлыкка күчеп, урыс яисә чит ил радиолары тыңлый башламасмы? Югыйсә аерма да юк кебек. Күп кешенең ни өчен татарча радио тыңламавын аңлый башладым шикелле. Болай да беткән йөрәкне ник газапларга?

Язмамны мин дә нәкъ ди-джейлар (аларга да берәр яңгырашлы тәрҗемә табасы иде) тапшыруларын бетергән кебек йомгаклыйм: "Безнең гомер җән­нәткә тиң – кыска. Кадерен белик!" Менә шуннан аңлагыз...