ТР юстиция министры Мидхәт Корманов отставкага җибәрүләрен сораган

Бүген ТР юстиция министры Мидхәт Корманов ТР Президенты Рөстәм Миңнехановка, үз теләге белән вазыйфасыннан азат итүләрен сорап, мөрәҗәгать иткән. Аның мөрәҗәгате ТР Юстиция министрлыгы сайтында бастырылган.

“Әлеге адымым үз гаиләмне яклауда һәм намуслы исемемне кайтаруда катнашырга, шулай ук тикшерүгә басым ясыйм дигән сөйләшүләрне туктатырга мөмкинлек бирер, дип ышанам. ММЧна ирештерелгән ашыгыч мәгълүмат дөреслектән ерак, дип сезне ышандырам. Кызганычка каршы, безгә хокукый дәүләткә ирешүгә таба әле бик ерак икәнлегенә тагын бер кат инандым”, - дип яза М.Корманов.

Аның сүзләренчә, мондый авыр гаепләү чыгарганчы, РФ Конституциясенең 49 нчы маддәсен өйрәнергә кирәк булган. Моннан тыш, ул Интернетка аның һәм гаиләсе әгъзалары рөхсәтеннән башка гаилә фотосурәтләрен урнаштырган ММЧна искәртеп үткәнчә, бу “шәхси тормышка керү, һәм ул начар нәтиҗәләргә китерә ала”.

“Мин дә, тормыш иптәшем дә җинаятьче дип табылмаган. Үземне, һәм гаиләмне яклый алуымда шикләнмим һәм ышанам. Мин саубуллашмыйм. Очрашуга кадәр дим. Тикшерү нәтиҗәләрен көтик. Әлеге авыр минутларда аңлау һәм ярдәм күрсәткән кешеләргә рәхмәт”, - ди М.Корманов.

Исегезгә төшерик, Мидхәт Кормановның улы – 33 яшьлек Илдар Кормановка карата җинаять эше кузгатылган. Ул РФ ҖК 159 нчы маддәсенең 4 нче часте буенча җинаять кылуда шикләнелә (“Хезмәт урыныннан файдаланып, аеруча зур күләмдә мошенниклык кылу”).

Тикшерү нәтиҗәләре буенча, 2011 елның октябрендә Корманов ТР Энергетика министрлыгының юридик бүлеге җитәкчесе дип танышып, билгесез затлар белән “Леруа Мерлен Восток” ҖЧҖ кә шул фирма төзи торган сәүдә комплексын файдалануга тапшыру өчен җылылык һәм электр челтәренә тоташтыруга техник документларны, шулай ук кирәкле коммуникацияләр салу һәм тоташтыру буенча төзелеш-монтажлау эшләрен башкаруга “СЭМ” ҖЧҖ белән килешүләр төзү тәкъдиме белән мөрәҗәгать иткән. “СЭМ” ҖЧҖ не гамәлгә Илдар Кормановның әнисе куйган.

Нәтиҗәдә, гамәлгә куючысы “Леруа Мерлен Восток” ҖЧҖ булган “Интеллект и право” ҖЧҖ “СЭМ” ҖЧҖ белән килешү төзегән. Шулай итеп, “СЭМ ҖЧҖ исәп-хисап счётына 47 миллион сум акча күчерелгән, әмма килешенгән эш башкарылмаган.

Хәзерге вакытта вакыйганың барлык шартларын ачыклауга юнәлдерелгән тикшерү чаралары уздырыла. Җинаять эшен тикшерү дәвам итә.