Шартлау. Үчне мөселманнардан алалармы?

Дүшәмбе көнне Волгоград шәһәрендә автобуста шартлау булды. Алты кеше һәлак булды, 40 кеше яраланды, авыр хәлдәге бер­ничә кеше Мәскәүгә озатылды. Терактта һәлак булучыларның исемнәре барысы да ачыкланган. Дагстаннан Наидә Асиялова автобуста үзен шартлатканмы, бу эш дистанцион рә­вештә башкарылганмы – ачыкланып бетмәгән.

Шартлаткыч төрле тимер-томыр бе­лән тутырылган булган. Наидә Дагстаннан Волгоградка Мәскәү аша автобус белән килгән, дип ачыкладылар. Аның ислам динен кабул ит­кән, никахсыз яшәгән ире Дмитрий Соколовны эзли­ләр. Мәскәү янында туган бу егет бомба әзерләп биргән дигән фаразлар бар, дип хә­бәр ителә.

Асиялова Дагстанның Гунибә авылында туган (Шамил имам шушында сугышкан, рус гаскәрләре аны 1859 елның августында кулга алган). Бу авылда Наидә Асия­лованың әнисе, ике апасы яши. Әнисе – Рәүзәт почтада эшли. “Известия” газетасына ул кызының соңгы вакытта кайда ни белән шөгыль­лән­гә­нен, кем белән яшәгәнен белмим, дип сөй­ләгән.
Шул ук вакытта бу шартлау турында Интернетта күп сораулар таралды. Беренче­дән, теракт вакытында Асия­лованың паспорты табыла. Ул бөтен каналлардан күрсә­тел­де. Үз-үзен шартлатып үтер­гән кешенең паспорты ничек ертылмыйча сакланган? Ин­тернетның актив кулланучылары паспорттагы фото чын түгел, реаль фото­сурәт өстенә ялганны ябыштырганнар, дип дәлил­ләрен китерә. Хиҗаплы фото махсус куелганмы, ди­гән сораулар бирәләр.
Бу терактның кайтавазы итеп, сишәмбе иртәсендә билгесезләр Волгоградның мөселман гыйбадәтханә­се­нең тәрәзәсен ватып, шартлаткыч сыекча тутырылган ике шешә ыргыткан. Янгынны тиз сүндергәннәр, полициягә хә­бәр иткәннәр. 1350 нче мәхәл­лә йортында зыян күрүчеләр булмаган.

“ВТ” Волгоград өлкәсе­нең мөфтие Ильяс хәзрәт Биктимеров белән элемтәгә керде.

“Бик кайгылы хәлләр. Шә­һәрдә, өлкәдә барысы да шушы коточкыч вакыйга турында сөйләшә. Арабызда яшәгән кешеләр бит, алар арасында һәркем булырга мөмкин. Һә­лак булучылар, яраланган ке­шеләребез өчен кайгырабыз, гаиләләренә сабырлык телибез. Араларында татарлар юк. Мөселманнарга карата һәр­вакыт мөнәсәбәт яхшы иде. Шәһәрнең үзендә ике мәчет, өлкәдә 30 мәхәллә эшли. Монда бит сугыш күргән кешеләр яши, төрле милләтләр бар. Ә хәзер автобусны мөселман кешесе шартлатты, дип сөй­лиләр. Гыйбадәтханәгә һө­җүм итүне дә мин шуңа җавап дип кабул иттем. Ләкин кешеләрне үтерүчеләрне ислам белән бәйләргә кирәкми”, – дип әйтте мөфти.

Дәүләт һәлак булганнар­ның гаиләләренә 1 миллион сум күләмендә компенсация түләячәк. Авыр хәлдәгеләргә – 400 мең сум, җиңелчәрәк җәрәхәтләр алучыларга 100әр мең биреләчәк.