Яңадан “кышкы вакыт”ка күчәбезме? (Сораштыру)

“Җәйге вакыт”та яшәргә өйрәнеп беттек кенә дигән­дә, Дәүләт Думасы депутатлары “кышкы вакыт”ка күчүне кире кайтарырга булган. Түрәләр сәгать тел­ләрен күчерүнең төп сәбә­бен 2014 елда Сочида узачак Олимпиадага бәйләп аңлата. Бактың исә, Европа илләре белән Россия арасындагы өч сәгать­лек вакыт аермасы чит ил тамашачысына уеннарны күзәтеп барырга комачау итәчәк икән.

Октябрьгә кадәр “кышкы вакыт“ка күчү-күчмәү мәсьә­ләсе төгәл билгеле булырга тиеш. Сәгать телләрен “кышкы вакыт“ка күчерү тәҗри­бәсе безнең илдә 1981 елдан – Совет заманыннан бирле кулланыла. 2011 елда ул чактагы Президент Дмитрий Медведев тәкъдиме белән бу кү­ренеш туктатылып торды. Моның сәбәбен вакыт күчерү­нең, кеше сәламәтлегенә зыян салып, стресс­ларга ки­терүе белән аңлат­тылар. Сез бу сүзләр белән килешәсезме? Гомумән, яңа­дан “кышкы ва­кыт”ка күчү кирәкме?

Тәүфыйк Сафин, Казан­ның 12 нче номерлы хаста­ханәсе баш табибы:

– Кеше гасырлар буе бер төрле режимда яшәп ияләш­кән. Адәм баласының яшәү, эшләү, ял итү шартлары – барысы да вакытка бәйле. Аны гасырлар буе алмаштырмаганнар. Үзебезнең мө­сел­ман ке­шесенең дә бөтен көн тәртибе вакыт белән тыгыз элемтәдә. Закон кабул итеп кенә ке­шенең яшәү рәвешен үзгәртү мөмкин түгел. Та­бигатькә дә каршы килеп булмый. Сәгать теле күчкәнгә карамый, кеше барыбер элекке вакытында йокыга китә. Чөнки аның организмы үз режимында яшәргә өйрәнгән. Баш мие эшлә­венең дә үз программасы бар. Кайчан эш­ләргә, ял итәргә, сөенергә, көенергә икәнлеген дә һәр кешенең баш мие үзе билгели. Бу – адәм баласына бала чактан ук салынган генетик программа. Аны берничек үзгәр­теп булмый. Үзгәртергә тырышкан очракта, ул неврозга китерә­чәк. Шуңа күрә мин безнең ил терри­ториясендә сәгать кү­черүне кертүгә тулысынча каршы.

Айгөл Бәдретдинова, ТНВ каналында “Һава торышы” тапшыруы алып баручысы:

– Нинди дә булса үзгәреш кертер алдыннан, түрәләр иң элек яхшылап уйласын иде. Тәҗрибәләр кирәкми. Йә “җәйге вакыт“та гына калыйк, йә булмаса инде, тулысынча “кышкы вакыт”ка күчик. Бер сәгать исәбеннән икенчесенә “сикереп” йөрүнең бер уңай ягын да күрмим. Өлкән яшь­тәге кешеләр аеруча тилмерә. Аларның организмнары бик сизгер бит. Сәгать телләрен күчерү нәтиҗәсендә төрле чирләр дә арта. Күп кеше әнә шуннан зарлана. Шәхсән үзем сәгать күчерүне, Аллага шөкер, яхшы кичерәм.

Люция Галимуллина, эшмәкәр:

– Түрәләр рәхәтләнә инде бездә. Һәрберсенең – үз капризы. Медведев Президент булганда, халыкның сәламәт­леген кайгырткан булып, “кышкы вакыт“ка күчүне бетереп аткан булды. Путинга бу ошамаган, күрәсең. Яңа­дан “кышкы вакыт“ка күчәргә булган. Бала-чага уены белән бер бу, билләһи. Бәлки, хәзер “полиция”не яңадан “милиция” дип үзгәртергә­дер? Кызык бит!

Фәния Насыйрова, пенсионер:

– Бер вакыттан икенче­се­нә күчеп йөрү сәламәтлеккә зур зыян сала. Без хәзерге режимга ияләшкән инде. Шәх­сән мине ул тулысынча канә­гатьләндерә. Шуңа күрә “кышкы вакыт”ка күчүне ки­рәк санамыйм. Бар да ия­ләнгән тәртиптә барса, яхшы булыр иде.