Ваһапов фестивале - Финляндиядә (ФОТО)

14 сентябрьдә Хельсинки шәһәрендә Рәшит Ваһапов исемендәге IX Халыкара татар җыры фестивале концерты узды. Бәйрәмне Татарстан Дәүләт Советы Рәисе Фәрит Мөхәммәтшин тамаша кылды.

Фестивальгә Финляндиядә яшәүче милләттәшләребез генә түгел, ә Төркия, Швеция, Балтыйк буе илләре вәкилләре дә жыелды. Аларны сәламләп, проектның авторы һәм җитәкчесе Рифат Фәттахов фестиваль чараларынын соңгы елларда Россия төбәкләрендә генә түгел, ә ерак һәм якын чит илләрдә дә зур уңыш белән үтүен ассызыклады. "Без моның өчен иң элек Татарстан Республикасы житәкчелеренә ихлас рәхмәтлебез", - диде Рифат Фәттахов.

Татарстан Дәүләт Советы Рәисе Фәрит Мөхәммәтшин фестиваль кунакларына мөрәҗәгать итеп, болай диде: "Татарстан Республикасы дөнья буйлап сибелгән милләттәшләребезне берләштерү, аларның рухи ихтыяҗларын канәгатләндерү буенча зур эш алып бара. Бу жәһәттән Рәшит Ваһапов исемендәге татар җыры фестивале аерым игътибарга лаек. 9 ел эчендә ул үзенең республикабызга, халкыбызга кирәклеген раслады".

Бәйрәм концертында фестиваль лауреатлары Филүс Каһиров, Ришат Төхвәтуллин, Айгөл Хисмәтуллина, музыкантлар Aлиса Лабзина, Рөстәм Рахматуллин чыгыш ясады. Алар Рәшит Ваһапов репертуарыннан җырлар, композиторларыбызның классик әсәрләрен, татар-башкорт эстрадасының иң матур үрнәкләрен башкарды. Татарстан артистларының чыгышы тамашачыларның кайнар алкышларына лаек булды. Финляндия татарларының махаллә Рәисе Атик Али фестивальгә югары бәя бирде һәм “Нәкъ менә шундый артистлар, нәкъ менә шундый фестивальләр безнең күнелләрдә татар халкы өчен, Татарстан Республикасы өчен горурлык хисен ныгыта да инде," -диде.

Ваһапов фестивальнең Финляндиядә узган бәйрәмен шулай ук Төркия Республикасының Финляндиядәге илчесе Селах Корутюрк, Татарстанның Россиядәге Тулы хокуклы вәкиле Равиль Әхмәтшин, Татарстанның Финляндиядәге сәүдә вәкиле Абубәкер Магҗәнов тамаша кылды.

Фестивальнең оештыручылары – Татарстан Республикасы Мәдәният министрлыгы һәм Рәшит Ваһапов исемендәге татар мәдәнияте фонды.

1

2

3

4

5

6