Син урамнан кердеңме?

Дус кызыма операция булгач, төнгә сакларга бардым. Менә шунда табибларның чын йөзен күрергә туры килде дә инде миңа. Палатада өч кеше ята. Шуның икесе танышлык буенча, берсе “урамнан кергән” булып чыкты. Хастаханәләрдә “ашыгыч ярдәм” яки табиб юлламасы белән кергән кешеләрне шулай дип атап йөртәләр икән.

Дустым сөйләшеп килгән булса да, операция барышында төгәлсезлек җибә­реп, икенче кат ясарга мәҗ­бүр булганнар. Иртәнге якта Зөл­фия, йөрәгем авырта, сулап булмый дип, зарланды. Мин, аптырагач, ярдәм итәр­лек кеше эзләп киттем. Коридорда очраган бер ир табибны ияртеп килеп тә җиттем. Ул Зөлфиянең кулындагы баш бармагын каера башлады. “Тәк, сине травматологиягә җибә­рә­без”, – ди бу. “Нигә алай эшлисез, болай да авырыйм”, – ди танышым. “Авы­руыңны бер җирдән икенче­сенә күчерәм”, – ди табиб. Тик авырту гына барыбер басылмады. Яңадан коридорга чыгып киттем. Бүлек мөдире бүлмәсенә кереп, хәлне сөй­ләп бирдем. Ул авыруның фамилиясен сорады. Әйткәч, тиз генә палатага йөгерде. Зөл­фия янында йөгереп кенә йөри. Матур сүзләрен дә жәлләми. “Бу – наркоз тәэсире, сезгә ингаляция ясатырга кирәк. Әмма бүген шимбә, дүшәмбегә кадәр түз инде”,– ди ягымлы гына.

Төнгә каршы Светлана исемле ханым бик нык авырый башлады. Эчен тотып, идәнгә үк егылды. Баксаң, карынындагы биш айлык баласы чирле булган. Шуны бел­гән табиблар ясалма тудырырга кушканнар. Светлана “урамнан кергән” ханым булып чыкты. Янына ник берәү килеп карасын. Керә­ләр дә тупас кына сөйлә­шәләр. Әй­терсең, эчкече, бомж хатын бишенче баласын табып ята! Малай янына кыз гына табасы килгән югыйсә. Әм­ма аны ишетүче булмады. Әлеге хатынга карап, йөрәк туктар хәлгә җитте. Ничек инде, бүлектә гел хатын-кыз эшли бит! Үзләре үк бала тапкан кешеләр. “Хәле бик начар”,– дигәнгә, баласы тугач килерсез, чәй эчәбез әле“, – дип кенә җибәрделәр. Шулай да арада бер мәр­хә­мәт­ле яшь кыз табылды. Светланага җайлап кына караватка ятарга кушып, йомшак кына әйтеп матур сүзләр белән тынычландырды. Әмма ул кит­кәч, хатынның авыртуы тагын да көчәйде. Табиблар һа­ман чәй эчә. Түзде, сабыр хатын, ниһаять, баласын тап­ты.

Бала табу йортларында да шундый хәл бит. Гомумән, Гиппократ антына тугры табибларны табу кыенрак хә­зер. Алдан сөйләшеп яки акчасын түләп куйсаң, бер бел­мәгән акушерның “кызы”на әйлә­нә­сең, “ашыгыч ярдәм” чакырткан булсаң, сәгатьләр буе тулгак тотуга түзеп, чират көтә­сең. Ә чират көткән арада ни хәлләр буласын кем белә?!

Республика клиник хас­таханәсендә озак еллар эш­ләүче травматолог, профессор Якуб Ибраһимов мондый фикер әйтте: “Авырудан нидер көтү тәрбиядән килә, дип уйлыйм. Төрле һөнәр ияләре арасында төрле кешеләр бар. Кемдер рәхмәт әйткәнгә риза, ә кемдер нидер эләктерергә тырыша. Зур түрәләр миллиардлар урлаганда, гади эшче ник урламасын ди”.