Хат ташучыларның хезмәт хаклары артачак

Почта хезмәткәре халык һәм басма матбугат чарасы арасында арадашчы ролен үти. Шуңа күрә газет-журналларның киләчәге күп очракта нәкъ менә хат ташучылардан тора.

Хәзерге вакытта республикада барлыгы 4 мең хат ташучы исәпләнсә дә, аларның бары тик тугызы гына быел «иң-иң»нәр исемлегенә керү хокукы алды. Әлеге конкурс җиңүчеләрен 19 август көнне «ТАТМЕДИА» ачык акционерлык җәмгыяте башлыгы Рөстәм Бикмөхәммәтов сәламләде.

Шәһәрдә эшләү авыррак

 «Хат ташучы булып теләсә кем эшли алмый. Беренче чиратта, бу һөнәргә күңел белән тартылырга кирәк. Миңа заманында бик күп хат ташучылар белән аралашырга туры килде. Шунлыктан аларның ни дәрәҗәдә мөһим эш башкаруын яхшы аңлыйм. Почтальоннарны газет-журнал, хат таратучылар дип кенә карарга ярамый. Мәсәлән, авылларда хат ташучылар матбугат басмаларын тарату белән бергә халыкка пенсия дә өләшә. Шул рәвешле күбесе берьюлы берничә хезмәт башкарырга мәҗбүр», - дип сөйләде «ТАТМЕДИА» директоры.

Почта хезмәткәрләре көн дә очраша торган проблемаларга да тукталып узды ул. Әйтик, авыл халкында почтальоннарга ышаныч һаман да зур, ә менә зур шәһәрләрдә әлеге мәсьәлә шактый кискен тора — андый элемтә, гомумән дә, юк кебек. Әле алай гына да түгел, калаларда эшләүче хат ташучыларга эшләү күпкә авыррак та — алардан зур оперативлык, барлык яңалыклардан хәбәрдар булу таләп ителә.

Татарстанга хат ташучылар җитми

Соңгы 3 елда хат ташучыларның хезмәт хакы бөтенләй дә үзгәрмәгән диярлек. Аның күләмен арттыру турында күп сөйләнсә дә, проблема һаман да хәл ителмәгән. Шуңа күрә хәзерге вакытта республикада почта хезмәткәрләренә кытлык аеруча зур.

Бу проблеманы чишү кирәклеген ил җитәкчелеге дә аңлый. Күптән түгел Россия күләмендә бер миллион халкы булган шәһәрләрдә эшләүче хат ташучыларның хезмәт хакын арттыру өстендә эшли башлаганнар. Калган почтальоннарга исә андый бәхет киләсе елда гына елмаячак. Әлеге яңалыкны чарага җыелган кунакларга «Татарстан Почтасы» директоры Регина Кузнецова җиткерде. Күптән көтелгән бу мәгълүматны почта хезмәткәрләре көчле алкышларга күмделәр.

Уңышлы эшләүнең сере - халык белән аралашуда

Конкурс җиңүчеләре исә өч номинациядә бүләкләнде. Авылларда, кечкенә шәһәр һәм зур калаларда хезмәт куючы иң яхшы хат ташучылар рәхмәт хатлары һәм 30, 25 яки 20 мең сум күләмендә акчалата премиягә лаек булды.

Авыл җирлегендә эшләүче почтальоннар арасында җиңү яулаган Дания Госсамова белән Intertat.ru электрон газетасы журналисты да аралашты.

«Мин әлеге тармакта инде 9 ел эшлим. Шул вакыт эчендә бу һөнәргә чын-чынлап гашыйк булырга өлгердем. Безнең эштә иң мөһиме — газет-журналларны вакытында өләшү түгел, ә халык белән аралаша белү. Кеше синең килүне дүрткүзләп көтеп торсын. Шул вакытта гына хат ташучы үз эшен җиренә җиткереп башкара дияргә була», - дип уй-фикерләре белән уртаклашты җиңүче.

Ул инде пенсия яшендә. Шулай булуга да карамастан, әлеге эше белән саубуллашырга җыенмый да. Авыл халкы бик ярата икән үзен. Пенсиягә чыгу уеннан да нәкъ менә алар кире кайтарган. «Син булгач, рәхәт» диләр. Шуңа күрә, тагын берничә ел эшләрмен әле, Аллаһы бирсә», - дип елмая Дания ханым.