"Салаватның яшь чагы" - Салават Фәтхетдиновның абыйсының улы зур сәхнәгә чыга (ИНТЕРВЬЮ)

Салаватның 25нче сезон концертларында Казан тамашачысы яңа җырчы белән танышты. Ул – Айдар Фәтхет­динов. Салават Фәтхетди­нов­ның абыйсының улы, Башкортстанда яшәп иҗат итүче җырчы икән.

– Айдар, сине кем дип белик?

– Башкортстанның Тә­тешле районы Аксәет авылы урта мәктәбе сәхнәсендә җырлап чирканчык алганнан соң, ике дә уйламыйча, Уфа сәнгать училищесына барып кердем. Әмма билгеле бер сәбәпләр аркасында укуны тәмамлап булмады. Гаиләдә барыбыз да җырлый безнең. Мин дә җырдан аерыла алмадым инде, Яңавыл шәһәре мәдәният йортына эшкә кердем. Үзебезнең Тәтешле районы мәдәният йортында да, авыл клубында да эшләгән чак­лар булды. Халык һәр чыгышны яратып кабул итә иде. Район мәдәният йорты директоры мине күзәтеп йөргән дә, беркөнне: “Айдар, син бу сәхнәләргә генә сыеша ал­мыйсың, Уфага яки Казанга бар әле”, – ди. Җиңел генә кузгалып та китеп булмый бит әле ул. Беренче тапкыр  Уфа телестудиясенә әтине туган көне белән котлап җыр яздырыр өчен килдем. Шәһәрне начар беләм, үтенеп сорагач, Интернет аша танышым Ми­ләүшә мине озата барды. Һәм минем бәхеткә булып чыкты бу озату. Җыр яздырырга кил­гән җиремнән гомерлек юлдашымны, иҗатта­шымны таптым.

– Концертта тамашачы сезне Салаватның яшь чагы дип кабул итте. Төс-кыя­фәтегез белән сез аңа бик охшаган.

– Бу хакта миңа еш әй­тәләр. Төс-кыяфәтне берничек тә үзгәртә алмый­сың, тавыш тембры да Ходайдан. Ә менә репертуарны үзенчә­лекле итеп төзергә була. Бү­ген Миләүшә белән шул юнә­лештә эшлибез дә. Миңа салмак, тирән мәгънәле, бормалы җырлар ошый. Ми­ләүшә әле мине оялчан  кеше дә ди. Салават абый холкы белән әтигә охшаган. Әтием мәрхүм шундый ук тиктормас, җор телле, мәзәкчән иде. Ә мин холкым белән әнигә охшаганмын. Абыйга охшаталар икән инде, бик яхшы, мин шат кына. Мин Салават абый белән горурланам. Фәтхет­динов дигән фамилия генә дә ни тора!

– Концертта үгет-нәси­хәт стилендәге җыр баш­карды­гыз. Репертуарны ничек сай­лыйсыз, кайсы композиторлар белән эш итәсез?

– Бу җырны Салават абый үзе сайлады. Анысы да кызык килеп чыкты аның. Ул минем җыр дискын кемнеке икән­леген белмичә генә тыңлаган. Тыңлап торган да, карале, Ләйсән, берәү монда миңа охшатып җырларга тырыша, дигән. Ләйсән апа: “Безнең Айдар ич ул”, – дигәч, концертка чакырырга уйлаган. Башкару җәһәтеннән “Ташлады дип, елама” (Ә. Әтна­баев сүз., М. Гайсин көе) җыры җиңелләрдән саналмый. Лә­кин мин аны ихлас­тан җыр­ларга тырыштым. Күбе­сенчә Башкортстан композиторлары белән эшлим. Шунысы да кызык: “Ташлады дип, елама” җырын Казанда беренче генә җырлавым түгел. Аны композитор Мурат Гайсин концертында башкарган идем инде. “Туганлык сере” (Ә.Әбү­бә­керов сүз. И.Мө­сәлләмов көе), “Әллә көзләр якынлаша” (Р.Хәкимҗанов сүз., Р.Батыров көе), “Бураннар белән барам” (Р.Миң­нуллин сүз., А.Имаев көе) дигән җырларны да яратып башкарам. Беренче дискым “Туганлык сере...” дип аталса, халык җыр­ла­рыннан гына торган икенче диск яздыру ниятем дә бар.

– Аңлавымча, сезнең сәхнә образын хатыныгыз Миләүшә тудыра.

– Миләүшә беренче көн­нән үк минем концертларны оештыру, диск чыгару эш­ләренә алынды. Ул мине сәх­нәдә хәрәкәтчән булырга ки­рәк, физик формада торырга кирәк дип өйрәтә, үзе күзал­лаган образга яраклаштырырга тырыша. Ләкин авыл малаенда кирелек тә хәттин ашкан. Аңа минем белән җиңел дә түгелдер инде. Сәхнәдә сикереп йөрү минем холкыма туры килми, әмма багана кебек басып торырга ярамаганлыгын да аңлыйм. Бүген Миләүшә тәэсирендә тискәрелегемә кар­шы килеп яшәп ятышым. Салават абый концертында Фәрештә белән Шайтан бә­хәсләшә бит әле. Миндә дә әнә шул диалог бара. Әле Шайтан җиңә, әле Фәрештә...

Шулай итеп Казан тамашачысы Айдар Фәтхетдинов дигән җырчы барлыгын белде һәм аның башкаруындагы җырны да ошатты. Димәк, сәхнәдә тагын очрашулар булыр дип өмет итик.