|
|
Бүген кемнәр туган
|
|
Архив
|
10.01.2009 Могҗиза
КАЗАН АРТЫНДА АГАЧЛАР СӨЙЛӘШМИИнтернетта актарынганда бер яңалык күзгә ташланды. “Правда.ру” сайты Казаннан 50 чакрым ераклыкта урнашкан ясалма күл буенда гайре табигый хәлләр күзәтелә дип хәбәр итә. Имештер, анда агачлар сөйләшә, ишек шыгырдаган һәм башка сәер тавышлар ишетелә. Могҗиза моның белән генә тәмамланмый. Сулык янындагы бер каен агачы үрелгән толым кыяфәтенә кергән. Юкәләр исә диңгез дулкыннарын хәтерләтә, фотога төшерсәң, шәмәхә төстә чыгалар. Сулыкның икенче ягында каеннардан кала бөтен агачлар корып беткән, ә үләннәр исә котырып үсеп, ямь-яшел булып утыра. Ясалма күл буен белгечләр килеп тикшереп, бу геопатоген зона дигән нәтиҗәгә килгәннәр. Ә менә сәер тавышларны һәм агачлар коруын хәтта алар да аңлата алмаган.
Сайт хәбәр итүенчә, энергия бүленеше агачларны үтерә, ә кешеләрнең аңына тәэсир итә, имеш. Нәтиҗәдә кешеләрнең колагына чит тавышлар ишетелә башлый, агачлардагы бизәкләр дә галлюцинация нәтиҗәсе икән.
Казан тирәсендә балык үрчетүче ясалма күлләр җитәрлек. Сүз аларның кайсысы турында бара икән дип кызыксына башладык.
Арча районында Балык күле бар. Нәкъ интернет-хәбәрдәгечә тирәсендә агачлар да үсеп утыра. “Күл дә бар, балык та бар, тик андый сәерлекләр ишетелгәне юк, – диделәр безгә. – Аның каравы, Каенсар урманындагы бер кварталда компас кулланып булмый. Ул бертуктамый әйләнә, икенче кварталга чыгу белән нормаль эшли башлый. Инде берничә кеше килеп әйтте”.
Яшел Үзән районында ясалма күлләр, гомумән, юк икән.
Кама Тамагы – без билгеләгән 50 чакрым радиуска керми, шулай да балыклы район булуын истә тотып, анда да чылтыратып алдык. Районда 20 күл, 4 буа бар икән, тик берсе дә ясалма түгел һәм балык та үрчетмиләр. 7 ел элек карплар үрчеткәннәр-үрчетүен, әмма андый-мондый сәерлекләр күзәтелмәгән.
Ясалма сулыклар Югары Ослан районында да юк. Алар безгә Кайбычка чылтыратып алырга киңәш иттеләр. “Аларда бик зур балык күле бар”, – диделәр. Әмма Кайбычның Борындык авылы янындагы ясалма күл могҗизасыз гына яшәп ята булып чыкты.
Биектау районында 40тан артык күл бар икән, тик гайре табигый күренешләр күзәтелмәгән.
Лаеш районының Пәрәү сулыгында да – тынлык.
Шулай итеп, могҗизалы күл табылмады, ә теге хәбәр сенсация өчен җибәрелгән “үрдәк” булып чыкты.
Гөлнара САБИРОВА |
Иң күп укылган
|