Республикада су астында калган мәчет һәм чиркәүләрне эзли башлыйлар

28 май көнне республикада «Татарстанның изге урыннары» проекты старт ала. Аның максаты - төрле сәбәпләр аркасында җимерелгән, юкка чыккан мәчет һәм чиркәүләрне эзләп табу, шул урыннарга истәлек такталары урнаштыру.

Әлеге чара инде икенче ел рәттән уздырыла. Аның төп оештыручылары - Рус географик җәмгыятенең Татарстандагы бүлеге вәкилләре. Акция Куйбышев һәм Түбән Кама сусаклагычлары территориясендә узачак.

Су төбен 10 яшьлек аквалангистлар да тикшерә

Бу объектларны төзегәндә барлыгы 19 чиркәү һәм 20гә якын мәчет су астында калган. Әлеге урыннарны бер төркем аквалангистлар тикшерәчәк. Аларның бурычы - су төбенә төшеп, әлеге изге биналарның нигез ташларын алып менү. Кагыйдә буларак, бу экспонатлар музейларга тапшырыла, ә мәчет яки чиркәү булган урын ярына истәлек такталары урнаштырыла.

Аквалангистларга килгәндә, аларның барысы да Рус географик җәмгыяте вәкилләре. Араларында 10 яшьтән алып 60 яшькә кадәрге су төбен тикшерү осталары бар икән.

Хәзрәт су астында намаз укырга хыяллана

«Проект республикабызның изге урыннары турында мәгълүмат тупларга ярдәм итеп кенә калмый, ә балалар, яшүсмерләр, өлкәннәр һәм, хәтта, әби-бабайларны да рухи яктан тәрбияләргә ярдәм итә», - дип белдерде «Татмедиа» агентлыгында узган матбугат очрашуында оештыручыларның берсе, «Нур» мәчете имам-хатыйбы Мөхәммәт хәзрәт Кыямов. Аның хыялы - су төбендә калган мәчетләрнең берәрсе янына төшеп, намаз уку. Ул бу эшкә әзерләнә башлаган инде.

Аның сүзләренә караганда, республикада бу эшчәнлекнең ни дәрәҗәдә мөһим булуын аңлаучы дин әһелләре, бигрәк тә хәзрәтләр сирәк. «Әлеге мәчет һәм чиркәүләр юкка чыгуларына да карамастан, барыбер изге урын булып кала бирә, анда фәрештәләр җырлый. Дин әһелләребез моны аңласын, безгә ярдәм күрсәтсен иде», - дип мөрәҗәгать итте имам-хатыйб үз чыгышында.

2013 елның беренче фәнни-тикшеренү эшләре Лаеш районының Мысы һәм Мансур авыллары территориясендә узачак.