Әтисе кубогы улында

Күптән түгел Кочко-Пожар хоккей командасы Сергачның “Лидер” ФСКсында икенче истәлек турниры оештырды. Монысы мәскәүле авылдашларына, Сергачта ясалма бозлы хоккей мәйданчыгы барлыкка килгәч бу спорт төрен яңадан торгызуга зур һәм төп өлешне керткән Рафаил Равил улы Багаутдиновка багышланган иде.

Турнир ике көн (3, 4 май) дәвамында барды. Зур күчмә кубок өчен Сергачтан “Район-45” һәм “Локомотив”, Мәскәүдән “Дуслар”, Пильна районыннан “Петрякс”, Кызыл Октябрьдән – “Нуршат”(Семочки) һәм оештыручылар – “Кочко-Пожар” командалары ярышты.

Беренче көнне мәрхүмнең мәскәүле “Дуслар”ы киеренке уеннарда “Нуршат” белән “Петрякс”ны отты, ә Кочко-Пожардан авылдаш дуслары шәһәр командаларын җиңде. Шулай итеп икенче көнне узачак финал матчка мәрхүм Рафаилның мәскәүле һәм авылдаш дуслары чыкты. Ә өченче урын өчен “Район-45” белән “Петрякс” уйнады. Бу матч, чын мәгънәсендә, иң кызык, иң мавыктыргыч, финал матчка тиң иде. Алар төп вакытта тигез исәпкә уйнап (4:4), җиңүчене буллитлар ярдәмендә генә ачыкладылар һәм өченче кечкенә кубокны “Район-45” яулады.

Финал матч көткәнчә киеренке булып чыкмаса да, ул күпләрнең күңелендә һәм хәтерендә КХЛда чыгыш ясаган 19 яшьлек якташыбыз (Өчкүл), Новокузнецкның “Металлург” төп командасы уенчысы Дамир Равил улы Җәфәровның чыгышы белән истә калачак. Ул матчның ярты өлешен пожарлылар өчен уйнады, ә икенчесен – мәскәүлеләр өчен. Үзенең катнашы белән шушы истәлек турнирын бизәгәне, аның абруен күтәргәне өчен оештыручылар исеменнән мәрхүм Рафаилның хатыны Наҗия ханым Дамирны Рәхмәт хаты һәм матур түбәтәй белән бүләкләде (фотода).

Бу турнирның тагын бер игътибарга лаек үзенчәлеге – мәскәүле “Дуслар” өчен Рафаилның улы – 11 яшьлек Ильяс чыгыш ясады. Ул биш яшеннән бирле инде хоккей секциясенә йөри, мәрхүм әтисенең өметен аклаучы булырга охшаган. Кем белә, Сергач бозында бергә уйнаган кебек, бәлки 4-5 елдан зур хоккей сарайларында да якташ-милләттәшләребез Дамир белән Ильяс бер бозга чыгарлар. Һәрхәлдә, яшь профессиональ хоккейчыбыз шул теләкләр белән яшь өметебезгә өр-яңа профессиональ шартаягын бүләк итте. Аларның йолдызлы сәгатьләре әле алда, дип без дә ышанабыз. Ә финал матч мәскәүчеләр файдасына 8:1 исә-бе белән тәмамланды. Ләкин пожарлылар бер дә күңел төшенкелегенә бирелмәделәр, ерак юлны якын итеп килгән мәскәүлеләр дә бит Рафаилның бергә хоккей уйнаган дуслары, диделәр алар.

Шулай итеп, Рафаилның якты истәлегенә булдырылган зур күчмә кубокны аның улы Ильяска “Кочко-Пожар” командасы капитаны, турнирның оештыру комитеты рәисе Илһам Жиһаншин чын күңеленнән сөенеп тапшырды.

Әйтергә кирәк, оештыручылар тарафыннан бер генә дә команда бүләксез калмады. Яхшы уенчылар да кыйммәтле бүләкләр белән билгеләнде. “Лидер” ФСКсы директоры Николай Ерамасов бу турнирның Сергачта зур оешканлык белән узуына югары бәя бирде, киләсе елга тагын шулай бергәләшеп дустыгызның турнирын бездә уздырыгыз, диде. Оештыручылар һәм кунаклар, үз чиратларында, ФСК дирекциясенә, хезмәткәрләренә зур рәхмәтләрен белдерделәр.

Бу көннәрдә мәрхүм Рафаилның рухы аеруча шат булгандыр. Чөнки бөтен дуслары бергә җыелып аның истәлегенә искиткеч спорт бәйрәме оештырдылар.

Автор фотолары.