Бурычың булса, чит илгә чыгармаска мөмкиннәр

2013 елда суд приставлары федераль хезмәтенең Татарстан идарәсе тарафыннан 2901 кешегә карата чит илгә чыгуны чикләү турында карар чыгарылган. Әлеге гражданнарның юридик hәм физик затлар алдындагы гомуми бурычы 936 млн. сумны тәшкил итә. Тиздән җәйге яллар җитә. Күп кенә якташларыбыз чит илләргә җыена. Ерак сәфәргә чыгарга планлаштыручылар арасында бурычларын вакытында түләмәүчеләр дә бар. Еш кына андыйлар үзләренең ил чиген узарга хокуксыз икәнлекләрен тимер юл вокзалында, аэропортта, алар утырасы поезд яки самолет кузгалып киткәндә, билетларын учларына йомарлап калганда гына беләләр. Бурычларны алдан ничек тикшерергә соң?

Күңелсез хәлгә тармас өчен гап-гади өч кагыйдәне генә төгәл үтәргә кирәк:

- приставларда сезгә карата кузгатылган эш бармы-юкмы икәнен белешергә;

- булса, чит илгә чыгу хокукын чикләү турында карар чыгарылганмы икәнен ачыкларга;

- булган бурычны түләргә.

Бәхеткә без 21 гасырда – телекоммуникация системалары бик нык алга киткән заманда яшибез. Шуңа күрә дә, чит илгә юлга кузгалыр алдыннан, hәркем үзенең әлеге исемлектә бармы-юкмы икәнен өйдән чыкмыйча гына тикшереп карый ала. Моның өчен суд приставлары янына барып йөрү мәҗбүри түгел, бары тик www.r16.fssprus.ru сайтына керергә, “Банк данных исполнительных производств” кушымчасын ачарга кирәк. Анда физик hәм юридик затларның hәммәсе дә үзләренә кагылышлы мәгълүматны таба ала, бары тик исем-фамилияне яки предприятие исемен генә программага кертергә кирәк. Система бурычлы зат турында мәгълүматны - документның номерын, бурычның күләмен, суд приставларының территориаль бүлек адресын, суд приставының фамилиясен hәм телефонын күрсәтә. Әгәр дә сезгә карата суд эше кузгатылган икән, суд приставыннан сезгә ил чикләре ачыкмы-түгелме икәнен белешергә кирәк була.

Тагын бер күңелле яңалык: суд приставлары федераль хезмәте Android, iPhone hәм Windows Phone мобиль җайланмалары өчен “Банк данных исполнительных производств” кушымчасына керергә махсус кулланма әзерләде. Кулланучылар бурычлары турында кесә телефоныннан гына, тәүлекнең теләсә кайсы вакытында белешә алалар. Әлеге хәбәрләргә языларга да була, бу очракта бурычларыгыз турында хәбәр автомат рәвештә килеп торачак.

Шунысын да истән чыгармаска кирәк, бурычны тулысынча түләгәч, чит илгә чыгарга рөхсәт алу 10 тәүлеккә сузылырга мөмкин.