ЫШАНМЫЙК ЫРЫМНАРГА

Ырымнарга, күрәзәләргә ышану бездә киң таралган. Нилектән килеп чыга соң бу? Моның сәбәпләре төрлечә. Мәсәлән, берәү көлеп әйткән: “Майда өйләнсәң, маяться итәсең” дип. Бу русча сүз. Моңа бит руслар гына түгел, татарлар да ышана. Майда өйләнешү бик сирәк бит.

Кич белән тырнак кисмә, диләр. Элек бит ут булмаган, шуңа күрә тырнак ашамлыкка төшмәсен дип әйтелгәндер бу. Кич белән әҗәткә акча бирмә дигәннәре дә шул ук сәбәп буенча.

Берәр җиргә барырга чыккач, юлыңны аркылы песи киссә, эшләрең уңмавын көт тә тор. Моны күп кеше сынап караган, туры килә икән. Хикмәт нәрсәдә соң? Әгәр юлыбыз уңмаса: “Менә бит, песи чыккан иде, шуңа уңмады”, – дип әйтәбез. Әгәр уңса, без аны онытабыз гына. Өйдән чыкканда әйберең онытылып калса, юлың уңачак түгел инде. Чөнки өйдән чыкканда ук оныткач, бүген синең хәтер начар эшли. Тагын онытмам, дип ничек гарантия бирә аласың?!

Күрәзәгә ышану бар. Күрәзәчеләр алар кеше алдауда тәҗрибә туплаган инде. Катлаулы булмаган кешеләрне ышандырырга сүз табалар. Мәсәлән, “Синең югалту булган”, дисәләр, исеңә төшерә башлыйсың. “Бер ай элек тавыгым үлгән иде, шуны күрсәтә инде бу”, – дисең. Алар 20 процентын тәҗрибәләре яхшы булу белән туры китерсә, калганын тәҗрибәсезлегең аркасында син үзең туры китерәсең.

Узган ел Зәйгә Хөсәен табиб сеансына бардык. (Дәвалану өчен түгел, алдаганын үз күзем белән күрер өчен). Үз күзем белән күрдем. Мин көткәннән дә артык булды. Сәхнәдә алты кеше утыра. Табиб сорый: “Сиңа нәрсә булды?” Җавап: “Дүрт ел элек паралич сукты”. “Авыру кеше”не сыпыра да: “Йөреп кара”, ди. Теге сәхнәне әйләнеп кире урынына килеп утыра. Ә аларның кайберләре, халык җыелгач, үз аяклары белән кереп утырган иде.

Кассетаны кабызып куя да залда рәтләр буйлап бар кешене дә сыпырып йөри башлый. Кассетада дөньяда нинди чирләр бар, барысы да язылган. “Инфаркттан тереләсең, бүсердән тереләсең” һәм башкалар. “Балаңны җиңел тудырырсың” дигәндә ир кешегә туры килүе дә мөмкин. Сайлап йөрми бит ул, рәттән бара. Бар кешене дә терелткәч, больницалар да кирәк түгел инде.

Рекламада: “Ватык сәгатьләрегез йөри башлый”, дигән. “Сәгатем йөри башлады” дигән бер кешене дә ишетмәдем. Үземнең дә ничек булган, шулай калды.

Иң гаҗәбе шул: халык шуңа ышана. Демократия. Кем нәрсә эшлисе килә, шуны кыла.

Күрәзәчегә ышану - зур гөнаһ. Аңа ышану Аллаһы Тәгаләгә ышанмау була бит. Чөнки алар үз өсләренә Аллаһы Тәгалә вазыйфасын ала.