Сукбайлар һәм хәер сорашучылар җаваплылыкка тартыла башларга мөмкин

Тиздән республиканың җәмәгать урыннарында хәер сорашып йөрүче сукбайлар, "киләчәгеңне әйтеп бирәм" дип арттан ияреп йөрүче затлар штрафка тартыла башларга мөмкин. 28 март көнне Дәүләт Советы депутатлары әнә шул турыдагы закон проектын карады.

Бүген Татарстанның Дәүләт Советы депутатлары парламентның чираттагы утырышына җыелды. Сессия тарихта беренче мәртәбә республика гимны музыкасын сүзләре белән бергә башкарудан башланып китте. Утырышта катнашучылар арасында Татарстан премьер-министры Илдар Халиков һәм республиканың Дәүләт киңәшчесе Минтимер Шәймиев тә бар иде.

Хәер сорашучылар белән көрәш тиешенчә башкарылмый

Депутатлар игътибарына тәкъдим ителгән закон проектларының берсе хокук саклау органнарының теләнчелек белән көрәш нәтиҗәлелеген арттыруга багышланды. Аның эчтәлеге белән Казан Шәһәр Думасы сәркатибе Людмила Андреева таныштырды.

Казан шәһәре прокуратурасы җәмәгать урыннарында сукбайлыкны, хәер сорашуны һәм исерек хәлдәге затларны булдырмауга юнәлдерелгән законнарның үтәлешен өйрәнгән. Нәтиҗәдә, бу юнәлештәге эшчәнлекнең тиешле дәрәҗәдә алып барылмавы ачыкланган, ә сукбайлык һәм хәер сорашу белән шөгыльләнүче затларны җаваплылыкка тарту исә бөтенләй дә каралмаган. Бу исә теләнчелекне кисәтү эшендә шактый гына кыенлыклар тудыра.

Универсиада алдыннан сукбайлар кая "китәр"?

Алда әйтелгәнне истә тотып, Татарстанның Административ хокук бозулар турындагы кодексына үзгәрешләр кертергә кирәклеге турында карарга килгәннәр. Әгәр дә әлеге закон проекты кабул ителсә, урамда халыкка бәйләнеп, багу белән шөгыльләнеп һәм хәер сорашып йөрүче затларның һәрберсенә махсус штрафлар салына башлаячак. Бу исә, үз чиратында, әлеге затлар тарафыннан кылына торган хокук бозуларны сизелерлек киметергә мөмкинлек бирәчәк.

Әлеге проблема Җәйге Универсиада уеннары алдыннан бигрәк тә актуаль. Урамда хәер сорашып утыручылар башкала кунакларында нинди фикер калдырачагы көн кебек ачык. Тикшеренүләр күрсәткәнчә, хәер сорашу белән шөгыльләнүчеләрнең күбесе БДБ һәм Урта Азия илләреннән килүчеләр икән. Мәсьәләнең бу ягын да тиешле дәрәҗәдә уйлап бетерү кирәктер, дип әйтелде утырышта.

Депутатлар Универсиаданың милли төсмере турында фикер алышырмы?

Шунысын да билгеләп үтү кирәк, Дәүләт Советы депутатларының киләсе утырышында Универсиаданың милли төсмере турындагы мәсьәләне дә күтәрергә мөмкиннәр. Әлеге тәкъдим белән депутатлар Роберт Миңнуллин һәм Разил Вәлиев чыкты.

"Универсиада барыбыз өчен дә бик әһәмиятле чара. Тик ул спорт чарасы гына түгел, ә халкыбызны башка илләр игътибарына тәкъдим итү өчен менә дигән мөмкинлек тә. Без Универсиада вакытында әлеге эшчәнлекне тормышка ашыру өчен нәрсәләр эшләнәчәге турында белергә, ишетергә тиеш. Универсиада җитәкчелеге шушында килеп, спорт уеннарының ачылу һәм ябылу тантаналары ничек узачагы белән безне дә таныштырсын", - дип тәкъдим итте Разил Вәлиев.

Аның сүзләренә караганда, Универсиаданы оештыручылар, әлбәттә, "бу әлегә зур сер, сюрприз" дип каршы килергә мөмкин. Тик сюрпризларның да төрлесе була. Универсиада вакытында оештырылган тантаналы чаралар республика халкын танытуга юнәлдерелгән булырга тиеш, дип саный Татарстан парламенты депутатлары.