Бардык, катнаштык, җиңдек

Татар телен һәм әдәбиятын укытуны камилләштерү, сәләтле укучыларны бу фәннәрне тирәнтен өйрәнүгә җәлеп итү, аларның шушы юнәлеш буенча югары һөнәри белем алуга омтылышын ныгыту һәм фән укытучыларына гамәли ярдәм күрсәтү максатыннан 18-20 февральдә Казанда татар теле һәм әдәбиятыннан Регионара олимпиада үтте. Бәйгедә 16 төбәктән 82 укучы һәм 21 укытучы катнашты.

Түбән Новгород өлкәсен Спас, Пильна һәм Кызыл Октябрь районнары укучылары күрсәтте һәм лаеклы урыннар алды. Кызыл Октябрь районы Зур Рбишча урта мәктәбе укучысы Алсу Хайбуллина 9 сыйныфлар арасында әдәбияттан беренче булды. Семочки урта мәктәбенең 10 сыйныф укучысы Алия Летфуллина шулай ук әдәбияттан призлы урынга лаек дип табылды. Спас районының Татар Моклокасы мәктәбе укучылары да сынатмадылар. 10 сыйныф укучысы Ринат Сабитов нәфис сүз конкурсында беренче урынга лаек булды (Хәсән Туфанның "Агыла да болыт агыла" шигырен сөйләде), 11 сыйныф укучысы Динара Сәмиуллина татар теленнән призлы урын алды.

Пильна районы Сафаҗай урта мәктәбенең 9 сыйныф укучысы Зөлфия Аляутдинова татар теленнән, 11 "а" сыйныф укучысы Гүзәлия Шамшетдинова әдәбияттан призлы урыннар алдылар.

Бәйге зур оешканлык белән узды. Беренче көнне "Идел" журналы хезмәткәрләре һәм яшь шагыйрь Рүзәл Мөхәммәтшин белән очраштык. Икенче көнне укучылар олимпиадада булган вакытта без, укытучылар, КФУ галимнәре белән аралаштык. Әлеге сөйләшүдә укучыларның язма эшләрендә очрый торган диалекталь үзенчәлекләре һәм яңа шарт-ларда мәктәптә татар әдәбиятын укытуның актуаль проблемалары турында сүз алып барылды.

Кич белән Кәрим Тинчурин исемендәге театрда "Гайфи бабай, өйлән давай" спектаклен карадык.

Бәйгене ябу тантанасында җиңүче һәм призлы урыннар алучы укучылар һәм аларны әзерләгән укытучылар Татарстан Республикасының Мәгариф һәм фән министрлыгы тарафыннан Дипломнар һәм китаплар белән бүләкләнделәр.

Бәйгегә әзерләгән укытучылар Сара Абдулхай кызы Сираҗетдиновага, Галия Юныс кызы Кутеровага, Динә Үмәр кызы Мустафинага, Факия Сәяр кызы Ситдиковага укучылар һәм аларның әти-әниләре зур рәхмәтләрен белдерәләр, киләчәктә саулык, эшләрендә зур уңышларга ирешүләрен телиләр. Шулай ук бәйгегә бару мөмкинлеген тудырган өчен мәктәп, район администрацияләренә рәхмәтебезне белдерәбез.

Галия КУТЕРОВА,
Татар Моклокасы мәктәбенең
татар теле һәм әдәбияты укытучысы.

Нижгар татарлары данын яклаган укучылар һәм укытучылар жюри әгъзалары белән.