11.02.2013 Спорт
Универсиаданы карарга җыенасызмы?
Универсиада, беренче чиратта, Татарстан халкы өчен үткәрелә. Аны республикада яшәүче һәркем карый алсын өчен бар шартлар тудырырга кирәк. Казан мэры Илсур Метшин шуны ассызыклап әйтте. Казан халкына Уеннар вакытында шәһәрдән китәргә киңәш бирәләр, дигән сүзләр исә мэрга ошап бетмәде. “Мондый сүзләр ризасызлык уята. Шәһәр тарихында булачак шундый зур чараны карамый калып булмый”, – диде ул бу хакта. Ә сез Универсиада вакытында нишләргә җыенасыз?
Анна ЗАХМАТОВА, Татарстан Дәүләт Советының Иҗтимагый мәсьәләләр комитеты әгъзасы:
– Ышансагыз – ышаныгыз, ышанмасагыз – юк, ләкин Универсиада вакытында мин җиң сызганып эшләячәкмен. Бөтендөнья Уеннары башкарма комитетының волонтерлар белән эшләү департаменты җитәкчесе урынбасары булып эшләгәнгә, мин аннан качып котыла алмаячакмын. Шуны ышандырып әйтә алам: Казан халкының июль аенда шәһәрдән китәргә мәҗбүриләү хакындагы сүзләр – уйдырма. Бу – гомердә бер килә торган вакыйга, Татарстан өчен зур адым. Кемнеңдер Уеннарга битарафлык күрсәтәчәгенә ышана алмыйм.
Фәндәс САФИУЛЛИН, сәясәтче, җәмәгать эшлеклесе:
– Җәйгә минем планнар ел саен бер үк. Исән-сау булсам, кояшлы көннәрне бакчада үткәрергә ниятлим. Һава торышы начаррак килсә, шәһәргә кайтачакмын. Көннәр кояшлы, җылы торса, киресенчә, бакчага китәм. Планнарымны Универсиадага бәйләп үзгәртергә җыенмыйм. Уеннар миңа, шәхси тормышыма кагылмый. Яшьләр өчен ул зур бәйрәм, алар карарга ашкынадыр.
Ленара КУТЕЕВА, Бөтендөнья татар конгрессының Чит илләрдәге татар иҗтимагый берләшмәләре белән эшләү бүлеге җитәкчесе:
– Дөресен генә әйткәндә, бу турыда уйлаган юк әле. Шулай да җәй көне шәһәрдә булырга, Уеннарны карарга җыенам. Бу үзеннән-үзе килеп туа торган җавап. Казанда торып та, Универсиададан читтә калсаң – оят. Мондый чарадан качарга кирәкми.
Лилия НУРИСЛАМОВА, Казан дәүләт медицина университеты студенты:
– Май аенда сессияне ябып, туган ягым Әлмәткә кайтып китмәкче идем. Алай җиңел генә котылып булмас, дип куркыттылар. Аңлатуларынча, укулар тәмамлангач, Универсиада вакытында безгә спорт объектларында беренче ярдәм күрсәтү буенча эшлисе була. Казанда ул вакытта мәхшәр булачак инде, ләкин вуз җитәкчелеге безгә ике уйларга бирмәде. Шуңа Казанда каласы булыр, ахры.
Алеся СИДОРОВА, архитектор:
– Әлегә мин Мәскәүдә. Заманча сәүдә йорты планы өстендә эшлибез. Ләкин җәй көне ялга чыгып, Универсиада карар өчен Казанга махсус кайтырга җыенам. Яшьрәк булсам, бәлки, волонтер булып та эшләгән булыр идем – студентлар өчен менә дигән мөмкинлек бит. Дөрес, Уеннарның һәр көнен дә күзәтеп барып булмас, ахры – сеңлем 12 июль көнне кияүгә чыгарга ниятли. Берәр айга соңартыйк туегызны, дип үгетләп карадык, ризалашмадылар.