Камил Исхаков: “Рубин”ны зур үзгәрешләр көтә

Камил Исхаковны яңа эшкә Президент үзе урнаштырган. “Рубин”да эшләү белән беррәттән, ул әле мәчеттә дә төзелеш эшләре алып бара.


Билгеле булганча, узган ел ахырында “Рубин” футбол клубы тирәсендә купкан шау-шу янәдән баш тренер Корбан Бәрдыев файдасына төгәлләнде. Дөрес, ул баш тренер булып кына калды. Вице-президент вазифаларын исә яңа елдан Казанның элеккеге мэры Камил Исхаков башкарачак. Попечительләр советы чыгарган әлеге карардан соң, ниһаять, Камил Шамил улы журналистлар белән очрашу уздырды.

Яңа вице-президент каләм әһелләре белән очрашуга килгәч тә, берничә үзенчәлеккә игътибар иттем. Беренчедән, Исхаков бик борчыла иде. Кереш сүзне әйткәндә бу бигрәк тә күзгә чалынды. Мөгаен, Ерак Көнчыгышта һәм Согуд Гарәбстанында вәкаләтле вәкил булып йөрүләр үз ролен уйнамый калмагандыр: Исхаков туган шәһәрендәге беренче зур эшкә зур дулкынлану белән кереште. Икенчедән, элеккеге мэр журналистлар игътибарына да сусаган булса кирәк. Әйтергә кирәк, “Рубин”да сәгать ярымга сузылган очрашулар бик сирәк була. Камил Шамил улы исә сорауларга рәхәтләнеп җавап бирде, хәтта ки үзе сораулар бирдертте.

Хәер, соңгы үзенчәлек клубның җәмәгатьчелек белән аралашуында яңача эшли башлауны аңлаткан даимилеккә әйләнергә мөмкин. Яңа вице-президент беренче көннән үк яңача эшли башлаулары хакында белдерде. “Халык белән клуб арасында бушлык булырга тиеш түгел. Төрле сораулар туу мөмкинлеген истә тотып, без хәтта он-лайн аралашу эшен гамәлгә кертәбез”, - диде Камил Исхаков әлеге “ачылу”ның сәбәбен аңлатып. Гомумән, әлеге очрашудан соң клубта чыннан да зур үзгәрешләр башланачагын фаразларга мөмкин. Кайберләрен Исхаков үзе дә әңгәмә барышында атады. Әйтик, тамашачылар белән эшләүне көйләү һәм халыкны стадионга тарту белән хәзер читтән чакырылган белгечләр шөгыльләнәчәк (Украинада “Шахтер” белән эшләгәннәр), үз урыннарындамы, юкмы икәнен ачыклау максатыннан клубта эшләүчеләр аттестация узачак, идарә итү формасы да үзгәрәчәк. Кыскасы, “Рубин”га җитәкче булып килгәндә һәр өч президенттан да үзгәрү турындагы фикерләрне ишетеп килсәк тә, бу юлы чыннан да үзгәрешләр булачагына шик калмады кебек.

Президент үзе эш тапкан

Кереше сүзендә үк Камил Исхаков әлеге вазифага билгеләнүе көтелмәгән булуын искәртте. Һәм бу юнәлештә республика Президенты Рөстәм Миңнехановның роле зур булуын ассызыклады. Җиде еллар тирәсе читтә эшләп Казанга кайткан элеккеге мэрга эш табу турында Президент инде күптән уйланган икән. Попечительләр советында да әлеге тәкъдимне нәкъ менә Миңнеханов җиткергән. Карар кабул итү өчен Исхаковка бер ай вакыт кирәк булган. Шушы вакыт эчендә ул клуб президенты Валерий Сорокин белән очрашкан, ике тапкыр Төркиягә барып кайткан, баш тренер, уенчылар, клуб тирәсендә килеп туган шау-шуга сәбәпче Гекхан Түрә белән аралашкан, Парижга барып, яңа уенчы Янн М’Вила хакында сөйләшүләр уздырган.

Иң соңыннан, Рөстәм Миңнеханов белән күзгә-күз очрашу узганнан соң гына, 29 гыйнварда вице-президент булып эшли алуына инанган. “Зур канәгатьлек белән эшкә керешәм. Кайда гына булсам да, мин һәрвакыт “Рубин”ны күзәтеп килдем”, - диде 2005 елдан команданың почетлы президенты булган яңа җитәкче.

Франциядән футболчылар да кача

Әлбәттә, журналистларның беренче соравы клубның трансфер сәясәтенә кагылды. Аерым алганда, сакчы Сальваторе Боккетти буенча сөйләшү озынга сузылды. Вице-президент яшереп тормады: “Спартак” уенчыга күбрәк хезмәт хакы тәкъдим иткән. “Җәй көне Боккеттиның безнең белән килешүе вакыты чыгар иде һәм ул чакта ул бездән бөтенләй бушка китәр иде. Безнең дә аңа хезмәт хакын күтәрү мөмкинлеге бар, әмма без моны эшләмәдек”, - ди Исхаков. Аның сүзләренә караганда, Боккеттиның гонорарын арттыру уртача хезмәт хакын үзгәртүгә, башка уенчыларныкыларның кимүенә китерер иде.

Шул ук вакытта француз уенчысы Янн М’Виланың эш контракты, чыннан да, башкаларныкыннан югарырак бәяләнгән. Вице-президент моны аның җыелма команда уенчысы булуы белән аңлатты: “Азрак түләсәк, ул безгә килмәс тә иде. Без Янн белән сөйләшеп утырганда гына да, күрше өстәлдә Англиянең “Куинз Парк Рейнджерс”ы белән “Фулхэм”ыннан да скаутлар утыра иде”.

М’Вила дигәннән, француз актеры Депардье үрнәгендә әлеге илдән тиздән футболчылар да китә башларга мөмкин икән. “Без дә әле, бәлки, французлар белән ныграк кызыксынырбыз”, - диде бу вәзгыятькә бәйләп яңа вице-президент.

Универсиада гаепле

Исхаков белдергәнчә, барлык трансферлар да Бәрдыев белән килешенеп эшләнә. “Бәрдыев күрмәгән, белмәгән уенчы белән кызыксыну ул ахмаклык булыр иде”, - ди бу уңайдан Камил Шамил улы. Ләкин алга таба клуб “зур уенчылар” алмаячак. Чөнки финанс мөмкинлекләр чикле һәм моңа, беренче чиратта, Универсиада сәбәпче икән.

Универсиада дигәннән, уеннар аркасында “Рубин” 10 мартта “Зенит” белән бездә булырга тиешле уенны чит мәйданда (Грозныйда булса кирәк) үткәрергә җыена. Чөнки Үзәк стадионда Универсиада программасындагы җиңел атлетика буенча ярышлар узачак, шул сәбәпле андагы чирәм ямь-яшел булырга тиеш. Ә бу март башындагы уеннарда чирәмне бозмаска кирәклекне аңлата.

Әти теләген истә тотып

Иң соңыннан Intertat.ru хәбәрчесе Камил Исхаковтан аның “Казан нуры” мәчетендә попечительләр советы җитәкчесе булуы һәм бу юнәлештәге эшләре белән кызыксынды. Игътибар итсәгез, мәчет тирәсендә зур төзелеш эшләре, үзгәртеп корулар алып барыла. “Рубин”ның вице-президенты бу нисбәттән 6 февральдә әтисе Шамилнең вафатына ике ел булуын һәм андагы барлык эшләрдә катнашуын әтисенең теләк-фатихасы белән башлануын искәртте.

Биредә мәдрәсә һәм башка кирәк-яракларның төзелүен ул халыкның (бигрәк тә яшьләрнең) дингә күбрәк тартыла башлавы һәм аларга тиешле шартлар тудырырга кирәклеге белән аңлатты. Мәчет тирәсендә күпер төзүче төрекләр хәтта биредә бушка бер тәхәрәтханә дә эшләп куйганнар. Исхаков шулай ук Казанда никахханәләр аз булуын истә тотып, биредә никах тантаналары уздыру өчен дә бүлмәләр булачагын белдерде. “Бар да әтиемнең эшен дәвам итү теләгенә бәйле. Бу эшемне алга таба да алып барачакмын”, - диде Казанда, ниһаять, яңа эш урыны тапкан элеккеге хаким...