Әлмәт театрында “Туй” куелачак

Әлмәт драма театрында Бертольт Брехтның “Туй” (“Мещанская свадьба”) әсәренең репетициясе бара. Спектакльне сәхнәләштерү өчен театр Республика театр әһелләре берлегенең 400 мең сумлык грантына лаек булган иде. Спектакльне режиссер Искәндәр Сакаев куя.

Искәндәрнең бу Әлмәт театрындагы икенче эше. Ул сәхнәләштергән “Гашыйк Кәриб” спектакле бик уңышлы булды. “Гашыйк Кәриб” белән театр Казандагы яшь татар режиссурасы, “Нәүрүз”, Петербургтагы “Арлекин”, Самара өлкәсе Балаково шәһәрендә Кече шәһәрләр, Улан-Удэда “Алтын сэргэ” театр фестивальләрендә катнашып төрле дәрәҗәдә җиңүләр яулаган иде.

“Туй” спектакленең премьерасы 8, 9, 10 февраль көннәрендә булачак. Рәссам – Димитрий Хильченко,костюмнар буенча рәссам Петербургтан Стефания Граурогкайте. Артистлар белән вокалист Надежда Клинушина шөгыльләнә. Текстны Фәридә Исмәгыйлева тәрҗемә итте. Яшь немец парларының туен тамашачы сәхнәдә утырып караячак. Спектакльнең жанры татарча трагифарс дип тәгаенләнгән.