Озын телгә калын кесә кирәк

Сүгенү – начар гадәт. Сүгенү сүзләрен матбугат чараларында куллану – икеләтә, өчләтә начар. Россия Дәүләт Думасы моның өчен штраф сала башларга ниятли. Җәза күләме 200 мең сумга җитәргә мөмкин икән.

Әлеге закон проектын әзерләгән депутатлар төркемен җитәкләүче Сергей Железняк әйтүенчә, Роскомнадзорда “начар сүзләр” кулланучы матбугат чараларына карата шикаятьләр шактый икән. Шуңа алар Административ хокук бозулар кодексын махсус төзәтмәләр белән тулыландырырга булган. Ниятләре тормышка ашкан очракта, “сүгенә” торган газета-журнал, каналларга 20-200 мең сум күләмендә штраф чәпәргә мөмкиннәр. Эфирда телен тыя алмаган гади ке­шегә – 2-3 мең, ә урындагы затка 20 мең сумга кадәр чыгарып салырга туры киләчәк. Телеканал хуҗалары: “Тапшыру туры эфирда барды бит”, – дип тә аклана алмаячак, әлеге җәзалар турыдан-туры эфирга да кагылачак.

Сүгенү сүзләрен бер дә тартынып тормыйча кулланучы матбугат чараларына карата аннан да кырысрак җә­залар каралган. Әйтик, “тәртипсез” басмаларның бар тиражы сатудан алыначак. Интернетка килгәндә исә, мәгъ­лүматны сү­генү сүзләре ярдә­мендә җит­кергән сайт хуҗаларына башта кисәтү ясалачак. Сайт “начар гыйбарә”­ләрдән чистартылмаган оч­ракта, штраф салыначак. Сергей Железняк әйтүенчә, мәгъ­лүмат чараларын акчалата җәзалау белән Роскомнадзор шөгыльләнәчәк. “Идарә мәгъ­лүмат чарасына ике тапкыр кисәтү ясарга мөмкин. Өченчесе булмаячак – газета-журнал йә телеканалны лицензиясеннән мәхрүм итеп, бө­тенләй ябып куячаклар”, – дигән ул бу хакта.