19.10.2012 Мәдәният

Камал театры Кытайда (ФОТОрепортаж)

Камал театры 15 октябрьдә “Данлыклы Европа” дип исемләнгән V Халыкара Кытай милли театры фестивалендә катнашу өчен Пекинга килде. 16 октябрьдә артистлар һәм җитәкчелек Кытайдагы Рәсәй илчелегендә булдылар. Аларны вакытлыча илчелек җитәкчесе вазифаларын башкаручы Евгений Томихин кабул итте. Очрашу вакытында Татар Академия һәм Милли Кытай театрлары арасында киләчәктә алмаш гастрольләр оештыру хакында сөйләшү булды.

Баш режиссер Ф.Бикчәнтәев әлеге гастрольләр булган очракта кытайлыларны татар драматургиясе белән таныштыру өчен милли спектакльләр алып килү теләген җиткерде. Евгений Томихин Рәсәй илчелегенең ярдәм кулы сузарга әзер икәнлеген белдерде. Кытайда Рәсәй илчелеге иң зур илчелек булып санала.

Кичә 18 октябрьдә Г.Камал исемендәге Татар дәүләт Академия театры Пекин шәһәренең Кытай милли театрында К.Гоцциның "Хан кызы Турандык" спектакле белән “Данлыклы Европа” дип исемләнгән V Халыкара Кытай милли театры фестивален ачты.

Фестивальнең тантаналы ачылышына кытай артистлары, режиссерлары, сәнгать эшлеклеләре, илчелек вәкилләре чакырылган иде. Фестиваль ачылу алдыннан Г.Камал театрының директоры И.Якупов һәм баш режиссеры Ф.Бикчәнтәев Кытай милли театры директоры белән очраштылар. Бу очрашу вакытында да Татар Академия һәм Милли Кытай театрлары арасында киләчәктә алмаш гастрольләр оештыру мәсьәләсе күтәрелде.

Бүген 19 октябрь көнне Г.Камал театры артистлары янәдән Пекинның Милли театр сәхнәсендә К.Гоцциның “Хан кызы Турандык” спектаклен күрсәтәчәк.