Камаллылар Кытайга җыена

14 – 24 октябрь көннәрендә Г.Камал исемендәге Татар дәүләт Академия театры К.Гоцциның “Хан кызы Турандык” спектакле белән Пекин (Кытай) шәһәрендә үтәчәк “Данлыклы Европа” дип исемләнгән V Халыкара Кытай милли театры фестивалендә катнаша.

«Хан кызы Турандык» – спектакленең режиссеры Ма Джэньхон һәм рәссамы Бянь Вэньтон Казанга Карло Гоцциның әлеге әкиятен куяр өчен Кытайдан махсус чакырылганнар иде.

Спектакльнең премьерасы 2012 елның 6 апрелендә узды. “Хан кызы Турандык”ны Пекин тамашачысына тәкъдим итәр өчен камаллылар Кытайга тулы состав белән диярлек баралар.

Бу вакытта Г.Камал театры сәхнәсе дә буш тормаячак. Театрда түбәндәге гастрольләр көтелә:

 14-15 октябрь - В.В.Тхапсаев исемендәге Төньяк Осетия дәүләт Академия драма театры  (Владикавказ шәһәре);

16-21 октябрь – М.Горький исемендәге Оренбург дәүләт драма театры;

22 - 24 октябрь – В.И.Качалов исемендәге Казан академия зур рус драма театры.