Эльвира Хәсәнова - безнең чемпион

Синхрон йөзү буенча команда составында алтын медальгә лаек булган өч тапкыр олимпия чемпионы Эльвира Хәсәнова да тамырлары белән безнең яклардан – аның әтисе Пашат авылыныкы икән, Эльвира үзе дә бала чакта җәйләрен гел Пашатта уздыра булган. “Ел саен диярлек әти-әнисе белән бабасы йортына киләләр иде, бик батыр, акыллы кыз булып үсте, татарча шартлатып сөйли иде”, - ди күршеләре Җәфәр Шаймәрдәнов.

Бу Эльвира өчен өченче олимпиада инде булган, ул шулай ук команда составында 2004 елда Афинада, 2008 елда Пекинда олимпия чемпионы исемен яулаган. Мәскәүдәге “Олимпийский” спорткомплексына аны җиде яшендә әтисе китергән. Башта ул суга сикерү белән шөгыльләнгән, аннары синхрон йөзү секциясендә кызлар җитешмәү сәбәпле анда күчкән.

Соңгы олимпиада белән Эльвира спорт карьерасын тәмамлый. Киләчәккә планы – Казанда синхрон йөзү буенча спорт мәктәбе ачу (аның әнисе Татарстанныкы). “Россия бик зур ил һәм регионнарда да барлык спорт төрләрен үстерергә кирәк”, - ди ул.

Эльвира РФнең атказанган спорт мастеры, олимпиададан кайткач ул бүтән спортчылар белән бергә Россия президенты белән очрашуда булды һәм Владимир Путин аны IV дәрәҗәле “За заслуги перед Отечеством” ордены белән бүләкләде.

“Бик дулкынландыргыч мизгелләр иде, ни әйтсәң дә, һәр көн хөкүмәт башлыгы бүләкләми бит. Шулай ук бүләккә тапшырылган “Ауди А8” автомобилен әлегә белмим нишләрмен – бәлки үземә калдырырмын, бәлки якын кешеләремнең берсенә бүләк итәрмен”, - ди Эльвира.

Ул үзенең татар милләтеннән булуы белән горурлана, татарларга хас үҗәтлеге аңа җиңүләр яуларга булыша. Милли тәрбия, аңа, әлбәттә, гаиләдә бирелгән, Хәсәновлар милли гореф-гадәтләрне саклап яшиләр, кече ватаннарын бер дә онытмыйлар. Менә үткән атнада да Эльвираның әтисе Рамил һәм бабасы Мостафа Пашатка килеп мәрхүмнәрне яд итеп киткәннәр.

Без Эльвира кебек күренекле якташларыбыз белән чын күңелдән горурланабыз, ә аңа хыялын тормышка ашырып, үзе кебек олимпия чемпионнары үстерүен телибез.