Татар китабына 400 ел

Быел татар телендә беренче китап бастырылып чыгуга 400 ел, ә Россия күләмендәге беренче татар басмасы 290 ел элек дөнья күргән. Менә шушы даталарга багышлап, сишәмбе көнне Сафаҗай авыл китапханәсендә татар китабы бәйрәме оештырылган иде.

Анда район китапханәләре хезмәткәрләре, мәктәп укучылары, җәмәгатьчелек катнашты. Кичәне ачып, китапханәчеләр Зифа Сәбитова белән Равилә Адиятуллина беренче татар китабының, бүтән татар басмаларының тарихы, аларны чыгаручыларның, авторларның исемнәре белән таныштырдылар. Татар телендә беренче китап дүрт гасыр элек Әстерханда, Петр I нең поход типографиясендә бастырылган булган. Үз чиратында Екатерина II нче дә берничә тапкыр казна исәбеннән Коръәнне чыгарган, император законнары да татар телендә бастырылган. Алар тагы да татар басмаларына бәйле күп кенә кызыклы фактлар белән таныштырдылар.

Татар шигъриятендә, әдәбиятында исемнәре дөньяга танылган бөек шагыйрьләр, язучылар бик күп, аларның иҗаты турында да сөйләделәр, ә Габдулла Тукай белән Муса Җәлил иҗатына аерым тукталып үттеләр. Җирле мәктәп укучылары аларның шигырьләрен сөйләделәр, алтынчы класс укучылары Тукайның “Су анасы” шигырен бигрәк кызыклы, ачык итеп сәхнәләштереп күрсәттеләр. Ә Яңа Мочали мәктәбе укучылары Муса Җәлилнең “Кызыл ромашка” шигырен бик сәнгатьле сәхнәләштергәннәр.

 Халык мәдәнияте һәр милләтнең нигезе булып тора һәм милли йолаларны, гореф-гадәтләрне саклап үстерү өлкәсендә китапханә мәктәп белән тыгыз элемтәдә эшли, балаларда үз милләтләре, мәдәниятләре белән кызыксыну уяту, ихтирам тәрбияләүгә зур игътибар бирелә. Алтынчы класс кызлары “Күбәләк” биюен башкардылар. Мәктәптә Венера Аббясова җитәкчелегендә бию түгәрәге эшли, андагы “Умырзая” төркеменә кергән 10 класс кызлары бик матур итеп, профессиональ дәрәҗәдә “Су юлы” биюен башкардылар (фотода). Аларның милли костюмнары да искиткеч матур. Петрякслы Шамил Каюмовның көчле тавыш белән “Кара урман”ны башкаруы күңелләрдә тирән тәэсир калдырды.

 Наилә Айдуллина (Яңа Мочали) “Җидегән чишмә” җырын матур итеп җырлады. Җирле шагыйрьләр Назимә Мәликова һәм газета укучыларына яхшы таныш булган “Туган як”ның Һади Такташ исемендәге әдәби премиясе лауреаты Вафа Камалетдинов үз-ләренең шигырьләрен укыдылар. Тулаем алганда, кичә зур оешканлык, яхшы әзерлек белән узды, моны Пильна районы мәдәният бүлеге җитәкчесе Ирина Сысорева да үзенең чыгышында билгәлеп үтте. Әдәби кичә чәй өстәле артында җылы аралашу белән тәмамланды.

Фотода: "Умырзая" төркеме кызлары Эльвира Калимуллина, Румия Исхакова, Гөлназ Сулиманова, Ләйсән Эксанова, Равилә Лукманова һәм Найлә Исхакова.

Автор фотосы.