Федераль ТВ-каналларны Сабантуйны күрсәтергә мәҗбүр иттеләр

Россия хөкүмәте берничә телеканалның, шул исәптән НТВ каналының да тапшырулар программасына үзгәрешләр керткән. Хәзер бу каналларда Россиядә яшәүче халыкларның тормышы һәм мәдәнияте турындагы тапшырулар артырга тиеш.

Бу гамәл милләтара конфликтларга каршы көрәш максатында эшләнә. Тапшырулар планын Милләтара мөнәсә­бәтләр мәсьәләләре буенча ведомствоара эш комиссиясе раслаган. Әлеге комиссияне Россия Хөкүмә­те вице-премьеры Дмитрий Козак җитәкли.

План нигезендә 2012-2013 елларда Россия телевидениесе илдә яшәүче халыкның тормышы һәм мәдәнияте турындагы тапшыруларны арттырырга тиеш була. Федераль телеканалларда бу теманы чагылдырган документаль фильмнар күрсә­те­ләчәк, ә “ТВ Центр” һәм “Мир” каналларында Сабантуй һәм Корбан гаете бәйрәмнәреннән ту­ры­­дан-туры трансляция оешты­рылачак. Мәсәлән, бу каналларда Корбан Гаете көнендә Уфа Җәмигъ мә­четендә бәйрәм барышын турыдан-туры эфирда кү­рергә мөмкин булачак. Ә Раштуа бәйрәмендә Коткаручы Христос храмында гына түгел, ә Минск, Ватикан чиркәүләрендәге гыйбадәтне дә турыдан-туры эфирда күрсәтәчәкләр. Молдова диаспорасы өчен Яз килү бәйрәме – мэрцишор, үзбәк һәм таҗик­лар өчен 21 мартта бәйрәм ителә торган Нәүрүздән трансляция оештырылачак. Хакимият интеллектуаль тапшыруларда да Рос­сиянең мә­дәни төрлелеген чагылдырырга омтыла. Мәсәлән, НТВ­да күрсә­телә торган “Своя игра” тапшыруында әлеге темага кагылышлы сораулар күбрәк бирелә башлаячак икән.