Театр Шәһәр һәм Республика көннәренә багышлап өч спектакль тәкъдим итәчәк

Г.Камал исемендәге Татар дәүләт Академия театрында әлегә сезон ачылмаса да, театр, Шәһәр һәм Республика көннәренә багышлап, махсус Казанлыларга һәм килгән кунакларга өч спектакль тәкъдим итәчәк.

26 нчы август көнне И.Зәйниев әсәре буенча сәхнәләштерелгән “Бабайлары чуагы” спектакле. Ике өлештән торган әлеге лирик комедиядә Камал театрының әйдәп баручы данлыклы артистлры Наилә Гәрәева, Ринат Таҗетдинов, Әзһәр Шакиров, Равил Шәрәфи, Ирек Баһманов, Наил Дунаевлар катнаша.

27 нче август көнне узган сезонның үзенчәлекле премьерасы Ркаил Зәйдулла иҗат иткән “Үлеп яратты” әсәре буенча куелган спектакль. Беренче татар мөгаллимәләренең берсе, Россиянең мөселман дөньясында хатын-кызлар өчен иң беренче мәдрәсәгә нигез салучы һәм беренче хатын-кыз казый - Мөхлисә Бубый язмышы хакында әлеге спектакль.

29 нчы август көнне Камал театрының йөзек кашы – “Зәңгәр шәл” (Кәрим Тинчурин) спектакле. Инде ничәнче мәртәбә куелуына карамастан, ул үзенең популярлыгын югалтмый. Халык мәхәббәте аша “Зәңгәр шәл” легендарь спектакльгә әверелде. Татар театрын “Зәңгәр шәл”сез күз алдына китерү дә мөмкин түгел.

Спектакльләр 26 һәм 27 август көннәрендә 18:00, 29 август көнне 19:00 сәгатьтә башлана.